Ferrol está á cabeza da temporalidade (27,9% do total de asalariados), seguida de Pontevedra (26,2%) e Vigo (24%), segundo os datos do Instituto Galego de Estatística (IGE) correspondentes ao segundo trimestre de 2011. Dos 160.900 asalariados que traballan neste tres cidades, 40.200 fano por un período determinado.
 
Bastantes puntos por baixo atópanse o resto de urbes da nosa comunidade. Lugo, co 20,2% de temporalidade, é a que menos precariedade laboral ten entre as grandes cidades, seguida da Coruña (20,6%), Santiago de Compostela (20,7%) e Ourense (21,2%). A partir de hoxe entra en vigor a última reforma do mercado laboral aprobada polo Executivo central, que suspende o límite temporal para encadear contratos temporais. Os sindicatos xa denunciaron que esta medida precarizará aínda máis o mercado laboral.
 
As taxas de desemprego tamén adoita ser máis elevada naqueles municipios nos que a temporalidade é máis elevada. Así, Pontevedra (20,9%), Vigo (19,9%) e Ferrol (19%) teñen as taxas de paro máis altas, mentres que Lugo (12,2%), Ourense (15,4%) e Santiago (16,6%) rexistran as máis baixas. No caso da Coruña e Santiago, o desemprego disparouse desde 2009, xa que pasou dunha taxa do 10% en ambas as cidades á contorna do 17%, en liña coa media galega aínda que inferior á española, que se sitúa no 20,9%.
 
Se se observa o comportamento da poboación ocupada tamén se notan peculiaridades. O esborralle da industria, salvo en Lugo (onde se mantén o emprego) e Ourense (onde crece), foi xeneralizado en todas as urbes. O maior descenso do emprego industrial produciuse (entre finais de 2009 e o segundo trimestre deste ano) en Santiago (31% menos), seguido de Pontevedra (-30%), A Coruña (-24%) e Vigo (-18%). En Ferrol reduciuse un 5%. O emprego no sector servizos descendeu en Ourense (-7,6%), Santiago (-6,6%) e A Coruña (-6%). En Lugo mantense e subiu en Ferrol , Vigo e Pontevedra. Espectacular foi a caída do emprego no sector agrícola e pesqueiro en Vigo , que se derrubou un 69,5% en pouco máis dun ano.

Xornal