No texto explicítase que a duración do contrato será de dous anos, aínda que poderá prorrogarse outro ano máis en función das necesidades formativas do traballador ou das necesidades organizativas das empresas. Unha vez expirada a duración do contrato, o traballador non poderá ser contratado baixo esta modalidade pola mesma ou distinta empresa. Estes contratos non poderán efectuarse cando o posto de traballo correspondente ao contrato sexa desempeñado con anterioridade polo traballador na mesma empresa por tempo superior a un ano.
 
As empresas que, ao finalizar a súa duración, transformen estes contratos en indefinidos poderán gozar dunha redución na cota empresarial da Seguridade Social de 1.500 euros ao ano durante tres anos. No caso das mulleres, a rebaixa na cotización será de 1.800 euros anuais. Para ter dereito a estas reducións, a transformación deberá implicar un aumento no nivel de emprego fixo das empresas contratantes.
 
O traballador suxeito a este contrato deberá recibir a formación oportuna nun centro formativo recoñecido polo sistema nacional de emprego e a actividade laboral que desempeñe na empresa deberá estar relacionada coa formación que estea a recibir. Esta terá que comezar como máximo nun prazo de catro meses a contar dende a data da celebración do contrato.
 
O SMI SERÁ A REFERENCIA E A XORNADA NON PODERÁ SUPERAR O 75%

Segundo o borrador, o traballador poderá solicitar un certificado de profesionalidade en función da cualificación ou competencia profesional adquirida a través do contrato.
 
O tempo de traballo efectivo que desempeñe o traballador deberá ser compatible co dedicado ás actividades formativas e non poderá superar o 75% da xornada máxima prevista en convenio ou, no seu defecto, da xornada máxima legal. Tampouco poderán realizarse horas extraordinarias nin traballos nocturnos ou a quendas.
 
A retribución do traballador contratado baixo esta modalidade fixarase en proporción ao tempo de traballo efectivo pero, en ningún caso, o salario percibido poderá ser inferior ao SMI en proporción ás horas efectivas dedicadas. Ademais, o traballador contratado baixo esta modalidade terá dereito a prestación por desemprego e estará protexido por todas as continxencias e prestacións da Seguridade Social.
 
As empresas que efectúen contratos desta natureza dende a entrada en vigor da lei e ata o 31 de decembro de 2013 con traballadores maiores de 20 anos e inscritos no paro con anterioridade ao 16 de agosto de 2011 terán dereito, durante toda a vixencia do contrato, a unha redución das cotizacións empresariais do 100% no caso de que a empresa empregadora teña un persoal inferior a 250 persoas ou do 75% se igualan ou superan esa cifra. Para ter dereito a estas bonificacións, estes contratos deben traducirse nun aumento de persoal no seo das empresas.
 
Así mesmo, os traballadores contratados baixo esta modalidade estarán eximidos de pagar as súas cotizacións á Seguridade Social durante toda a vixencia do contrato.
 
Zapatero esfórzase en amosar a súa servidume ao capital até o último minuto do seu mandato.
 
É de público coñecemento, por experiencias anteriores, que esta modalidade contractual só serve para precarizar aínda máis o mercado laboral ó poñer a disposición do empresariado traballo real como se fose de formación, o/a traballador/a cobrar o Salario Mínimo Interprofesional pola parte proporcional do tempo real de traballo e liberarse ao empresario do pago de até o 100% das cotizacións empresariais.