A reforma laboral, que custou ao Goberno de Zapateiro a súa primeira -e ata agora única- folga xeral en setembro de 2010, non serviu para frear a onda de despedimentos na comunidade (ese non era o seu obxectivo, o que se fixo foi abaratar o despedimento). Lonxe de reducirse, o número de traballadores afectados por un Expediente de Regulación de Emprego (ERE) triplicouse en Galicia no primeiro cuadrimestre do ano, con respecto ao mesmo período de 2010, e o mesmo acontece cos empregados incluídos en despedimentos colectivos, segundo os últimos datos dispoñibles no Boletín de Estatísticas Laborais (BEL) do Ministerio de Traballo.
 
Só Cataluña e Madrid rexistraron no primeiro cuadrimestre do ano máis traballadores afectados por un ERE -de extinción, suspensión de contrato ou de redución de xornada- que Galicia, pero a comunidade galega foi a que máis empregados regulados por expedientes sumou en relación ao mesmo período de 2010. Galicia concentrou entre xaneiro e abril 12.394 afectados, fronte aos 16.720 de Cataluña e os 15.230 de Madrid. A comunidade catalá, malia ser a que concentra máis traballadores sometidos a unha regulación laboral, reduciu nun 23,5% a cifra respecto aos catro primeiros meses de 2010, cando contaba con 21.883 afectados. En Madrid, aumentaron un 86,9%, case a metade do incremento galego (+166,4%), con 7.742 traballadores afectados máis que no primeiro cuadrimestre do ano pasado.
 
Os asalariados incluídos nunha regulación de emprego disparouse en todas as provincias galegas. A Coruña contabilizou 2.006 afectados, fronte aos 1.774 dun ano antes; Lugo, 606 (tiña 316) e Ourense, 455, fronte aos 81 do primeiro cuadrimestre de 2010. Pontevedra foi a provincia máis prexudicada, con 9.327 casos, 6.846 máis que un ano antes. A reforma laboral propiciou que o número de expedientes autorizados creza un 21,7% en Galicia nin que aumenten un 39,8% no conxunto do Estado os traballadores incluídos nun ERE. Polo menos durante os catro primeiros meses do ano, nos que a cifra creceu ata os 98.151. A nova regulación ten como un dos seus obxectivos impulsar a flexibilidade interna das empresas para reducir os despedimentos, e é certo que o número de traballadores incluídos nun expediente de redución de xornada aumentou en Galicia dende os 178 de 2010 ata os 1.060 rexistrados entre xaneiro e abril deste ano. O problema é que ao mesmo tempo se triplicaron os asalariados sometidos a despedimentos colectivos.
 
No primeiro cuadrimestre contabilizáronse na comunidade galega 1.006 traballadores incluídos en despedimentos colectivos, un 182,5% máis que un ano antes -aínda sen a reforma, que se aprobou en xullo de 2010-, con só 356 empregados afectados. En relación ao cuadrimestre anterior, a cifra incrementouse un 111,3%.
 
Os empregados afectados por un despedimento colectivo, non obstante, representan só o 8,1% do total, unha porcentaxe similar aos incluídos nun expediente de redución de xornada (un 8,5%). A maioría, un 83,3%, afrontan expedientes de suspensión. Neste caso os afectados aumentaron un 150,8% ata os 10.328, mentres que un ano antes había 4.118.
 
A reforma laboral cumpre os seus obxectivos, facilitar o despedimento e facelo a custo cero para o empresario, en definitiva xeneralizar a precariedade e fai, en última instancia que sexamos os traballadores e traballadoras os que paguemos unha crise que non creamos.
 
Mentres todo isto acontece os sindicatos maioritarios abrazan, unha vez máis, os postulados gobernamentais apoiando una diminución salarial para traballadores e traballadoras.
 
Cunha actuación “condescendente” coa situación non imos solucionar os problemas económicos e sociais da clase traballadora, todo o contrario fortalécense as políticas encamiñadas á implantación de máis explotación e precarización de clase.
 
A alternativa de clase pasa pola mobilización e a aniquilación do sistema.