Na carta de despedimento facíase referencia á falta de "colaboración" do traballador cos servizos médicos propios da empresa, relacionándoo coa súa negativa a solicitar a alta ao seu médico de cabeceira.
 
Tamén queda acreditado que a empresa despedira en moitas ocasións a traballadores en situación de baixa médica cando non aceptaban as recomendacións do servizo médico de empresa encamiñadas a unha reincorporación paulatina.
 
A sentenza considérao unha práctica habitual que vai acompañada da advertencia de despedimento, cualificándoo de coacción ao traballador que conta cun parte médico expedido por un facultativo da sanidade pública que entende que non se encontra en condicións para reincorporarse ao traballo.
 
O Tribunal Supremo fai referencia á doutrina do Tribunal Constitucional, recollida en dúas Sentenzas do 2007, que vén a sinalar que o dereito a que non se dane ou prexudique a saúde persoal queda comprendido no dereito á integridade persoal (art.º 15 da Constitución: "Todos teñen dereito á vida e á integridade física e moral, sen que, en ningún caso, poidan ser sometidos a tortura nin a penas ou tratos inhumanos ou degradantes. ... "), pero só aquel risco ou dano que xere un perigo grave e certo para a saúde provocado por unha actuación ou omisión da empresa.
 
Di o TS que "...a presión baixo ameaza de despedimento para que o traballador abandone o tratamento médico que, con baixa no traballo, lle foi prescrito constitúe unha conduta que pon en risco a saúde e, por iso, unha actuación deste tipo ha de considerarse como lesiva para o dereito á integridade física de acordo coa doutrina constitucional citada. ".
 
Hai que sinalar que o criterio do TS vén sendo contrario á nulidade cando se demostra que a causa real do despedimento é o feito de encontrarse a persoa de baixa. O tempo aclarará que recorrido ten esta sentenza, toda vez que se trata dun caso moi particular no que se puido acreditar as ameazas de despedimento e as coaccións da empresa.
 
Algunha pista dános o profesor de Dereito do Traballo autor do articulo nun xornal especializado do que sacamos a información, quen, disimulando malamente o seu desgusto pola noticia, remata o seu comentario dicindo: "Encontrámonos, en fin, ante un criterio que, de ser confirmado polo Tribunal Constitucional, supoñerá a revisión dalgunhas prácticas empresariais de control 'de cerca” da incapacidade temporal. ".