1. O estado español é un dos países con menor presión fiscal da UE. As administracións públicas recadaron o 31,5% do PIB no 2010, segundo Facenda. A media europea, segundo os últimos datos de Eurostat, de 2009, é do 40,4%.
 
2. O estado español tamén é un dos países con máis diñeiro negro da UE. Segundo Funcas, a economía mergullada supón máis de 260.000 millóns de euros: un 23,7% do PIB. Se temos en conta ese factor, a verdadeira presión fiscal queda por debaixo do 30% do PIB real. Non hai na Europa occidental un exemplo similar.
 
3. A presión fiscal afundiuse coa crise, pero mesmo nos mellores anos estaba moi por debaixo da media da UE.
 
4. O burato nos impostos do estado non esta no IRPF dos traballadores por conta allea. A presión fiscal para aqueles que teñen unha nómina está, de media, no 39,6%: seis puntos por enriba da media da OCDE.
 
5. Pero o estado español é tamén un dos poucos países do mundo coñecido onde os autónomos e os pequenos empresarios declaran, de media, menos ingresos que os traballadores e os pensionistas, segundo denuncian dende hai anos os técnicos de Facenda.
 
6. Cun sistema fiscal europeo, as contas públicas non estarían no aperto en que están hoxe. O déficit en 2010 foi do 9,2% do PIB. A diferenza da presión fiscal entre o estado español e Europa é practicamente esa mesma porcentaxe do PIB.
 
7. Traducido: se o estado español tivese unha fiscalidade europea -aínda sen arranxar o problema da economía mergullada-, non habería déficit. Nin problemas co bono español. Nin recortes, nin axustes, nin discursos apocalípticos sobre o teoricamente insostible estado do benestar.