Canto mellor sexa o punto de partida, menor será a porcentaxe de mellora que pide a Xunta para outorgar os fondos, posto que os aumentos esaxerados son case imposibles. Ademais, non todos os obxectivos pesarán por igual. Docencia, investigación e transferencia do coñecemento. Non en balde, son as tres misións principais dunha universidade: xerar novo coñecemento, formar novos profesionais e ser permeable á sociedade na que traballan.
 
Investigación
 
Cun peso relativo do 30 % sobre o total, os sexenios de investigación que acumula o persoal sobre o total dos posibles son o indicador máis valorado pola Xunta, pois permite cuantificar os resultados que xera a investigación da universidade. Ademais, terase en conta tamén toda a produción científica e os programas de doutoramento que obteñan mención de excelencia.
 
Docencia
 
Tres son os indicadores dun apartado que supón o 25 % do total. O de maior peso será o número de doutores dentro do corpo docente e investigador, aínda que tamén se terá en conta a taxa de gradación e o número de alumnos que acceden a cursos de posgrado por cada graduado.
 
Transferencia
 
Que os resultados da investigación no seo das universidades cheguen á sociedade é outro dos obxectivos principais das institucións. Neste caso, deberán centrarse por igual en aumentar o número de patentes concedidas e nos ingresos que xera para a universidade a transferencia dese coñecemento á sociedade.
 
Os programas de intercambio con universidades estranxeiras tamén terán moito peso, así como, por outra banda, a súa duración.