En primeiro lugar hai que observar que os países con máis servizos privatizados, como EUA ou Reino Unido acumulan, unha débeda-país enormemente alta. Isto segue sendo igualmente certo se realizamos o cálculo en porcentaxes de PIB. Como é posible acumular esta débeda se os seus servizos de transporte, subministración de enerxía, educación e sanidade están altamente privatizados?, Como é isto posible se as porcentaxes de empregados públicos en Reino Unido son dos máis baixos de toda Europa?, Como é posible que nos países nórdicos, con abundantes servizos públicos e altas porcentaxes de funcionarios, sexa onde mellor se vive e onde teñen a débeda externa máis controlada?. A resposta é clara: A teoría neoliberal é unha xigantesca estafa, un engano que só beneficia ás grandes empresas, os seus directivos e os seus accionistas en detrimento do ben común e dos intereses da gran maioría dos cidadáns.
 
Numerosos exemplos así o testemuñan, sendo paradigmático o dos ferrocarrís británicos. Para afondar nos dogmas do neoliberalismo criminal e os enormes buratos que as súas amadas privatizacións rematan por provocar nas contas públicas dos países pode visitarse esta moi recomendable entrada do blog de Alejandro Pérez: Privatizar non é rendible.
 
A privatización engade ao custo natural do servizo a porcentaxe de beneficio do banqueiro prestamista, o soldo do directivo megabonificado, o dividendo do accionista especulador, a comisión do gran político intermediario máis os "custos de transición á competencia". Como é lóxico a tarifa final será moi superior ao resultante do simple custo do servizo, ofrecido sen ánimo de lucro e xestionado para conseguir un simple equilibrio entre ingresos e gastos.

Fonte: Internet