Unicef incrementou ata 780.000 o número de nenos en territorio de Somalia que corren o risco de morrer de fame se non reciben axuda de xeito urxente. «Estamos a falar só de Somalia», manifestou en rolda de prensa a portavoz de Unicef en Xenebra, Marixie Mercado, quen engadiu que o número total de nenos en situación de «malnutrición severa» en Somalia, Kenia e Etiopía sitúase nestes momentos en 2,3 millóns.
 
O dato supera ao dado o martes polo Alto Comisionado das Nacións Unidas para os Refuxiados (ACNUR), que cifrou en 500.000 os nenos que afrontan «un inminente risco de morte» en Somalia.
 
A ONU declarou o mércores a situación de fame negra en dúas rexións do sur de Somalia, Bakool e Baixo Shabele, unha circunstancia que non se daba neste país desde 1992.
 
Nacións Unidas insistiu nas últimas horas en que estamos ante a «peor crise alimentaria» dos últimos anos e redobrou os seus esforzos para que a comunidade internacional achegue os recursos financeiros necesarios para facerlle fronte. A organización internacional solicitou aos seus membros 1.900 millóns de dólares para axudar a Etiopía, Kenia e Somalia, pero desa cantidade só financiouse ata a data menos da metade.
 
«Temos un buraco de 1.000 millóns de dólares», dixo o xoves a subsecretaria xeral para Asuntos Humanitarios da ONU (OCHA), Valerie Amos, que advertiu de que a crise vai para longo.
 
Neste contexto, Unicef anunciou hoxe que ten previsto pór en marcha un plan especial para incrementar de xeito masivo as súas operacións humanitarias no corno de África. «Estamos a preparar a nosa capacidade loxística para entregar subministracións sen precedentes de alimentos suplementarios por toda a rexión», declarou Shanelle Hall, directora de subministracións de Unicef.
 
«Se queremos salvar vidas, temos que actuar agora. Temos que facer chegar cantidades enormes de medicamentos, vacúas e subministracións nutricionais na rexión o máis rapidamente que poidamos e facilitalos aos nenos que máis o necesitan», dixo Hall.
 
Desde comezos do mes de xullo, Unicef conseguiu facer chegar á zona 1.300 toneladas métricas de subministracións a algunhas das zonas do sur de Somalia máis afectadas pola seca e o conflito armado causantes desta catástrofe humana.
 
Pero o esforzo é claramente insuficiente, porque o prognóstico é que só 240.000 menores veranse beneficiados por esta axuda de Unicef, que estima que necesitará 100 millóns de dólares ata final de ano para poder levar a cabo con éxito a operación.
 
Mentres tanto, continúa o goteo de refuxiados somalís que foxen da fame no seu país cara ás veciñas Kenia e Etiopía.
 
ACNUR indicou hoxe que en Dadaab, campamento de refuxiados en territorio de Kenia que xa alberga a máis de 380.000 persoas, «seguimos recibindo a diario uns 1.500 novos refuxiados».
 
«En total, Kenia recibiu máis de 100.000 somalís no que vai de ano. En Etiopía, a rexión fronteiriza de Dollo Ado ve chegar a diario por centos de persoas, con máis de 74.000 chegadas desde xaneiro», explicou a portavoz de ACNUR, Melissa Fleming.
 
O principal desafío de ACNUR é axudar á xente que chega en condicións de saúde moi precarias, logo de camiñadas de ata dous meses para alcanzar os campos de refuxiados.
 
«Só o martes rexistráronse 15 mortes a consecuencia da malnutrición e de doenzas relacionadas no campamento de Kobe, na rexión de Dollo Ado», dixo Fleming.