"Teño 72 anos e son fotógrafo de películas". Así se presentou esta mañá José Luis Alcaine, o prestixioso director de fotografía que asinou algunhas das máis importantes películas do cine español, entre elas a última de Pedro Almodóvar, La pel que habito, e recente medalla de ouro da Academia de Cine. "Por ningunha das miñas 127 películas cobrei dereitos de autor. Non me queixo, xa me afixen a iso. Non estou aquí a reclamar un pedacito da torta, senón que se recoñeza a miña condición de creador, de creador de imaxes e de luz," asegurou Alcaine, que engadiu: Sorpréndeme que este Goberno se puxese do lado dos poderosos, ou sexa da SGAE, en vez de protexer os débiles. O director de fotografía recoñeceu que a súa sorpresa viña porque se trata dun Goberno que contou con "acertos en cuestións morais, como a saída da guerra de Iraq e o recoñecemento aos homosexuais,".
 
Sen imaxes en movemento non hai cine. Tampouco sen luz. E por que entón aos directores de fotografía non se lles recoñece a autoría nas películas? Iso é o que se preguntan dende hai anos estes operadores da luz e que agora, fartos e cansos, están decididos a chegar aos tribunais para que dunha vez por todas se lles considere como creadores. Reivindicación que chocou contra o muro da SGAE (Sociedade Xeral de Autores e Editores) e o Ministerio de Cultura, segundo denunciaron esta mañá nun encontro coa prensa, celebrado na sede de AISGE (Asociación Española de Autores de Obras Fotográficas Cinematográficas), a única entidade de xestión que integrou a este colectivo, tras a negativa da SGAE e DAMA.
 
AISGE aprobou en decembro pasado un cambio nos seus estatutos para poder acoller os directores de fotografía e deste xeito defender os seus dereitos de autor que, segundo eles, os recoñece a Lei de Propiedade Intelectual. O problema veu polo rexeitamento de Cultura a aprobar ese cambio de estatutos en AISGE, negando así a condición de autores dos directores de fotografía. Segundo denunciaron onte responsables da entidade de xestión, a ministra Ángeles González-Sinde negouse a recibilos a pesar de solicitalo ata en tres ocasións por escrito e máis dunha ducia de veces telefonicamente.
 
Sectarismo
 
Os responsables de AISGE acusaron a ministra de Cultura de sectarismo e de pregarse aos ditados da SGAE, da "que" é "socia", escudándose nunha interpretación "errónea" da Lei de Propiedade Intelectual para negarlles os dereitos. Unha lei, denunciaron, que se fixo como un traxe á medida para a SGAE. "A actuación de Cultura responde a unha consigna que non ten soporte xurídico nin político", asegurou Abel Martín, director xeral da entidade. "As reivindicacións deste colectivo son lóxicas, xustas e inapelables," engadiu Fernando Marín, vicepresidente de AISGE. "O que non queren dende a SGAE é repartir a torta dos dereitos", explicou Porfirio Enríquez, presidente de AEC, o órgano que reúne aos directores de fotografía.
 
Segundo a lei de Propiedade Intelectual, os creadores dun proxecto audiovisual son o director, o guionista e o músico. Algo que contrasta coa lei de Cine de 2007, que si incluíu os directores de fotografía na categoría de creadores e coas lexislacións de 23 países da Unión Europea que teñen recollido o dereito de autor deste colectivo. "A condición de creador e autor do director de fotografía está avalada polo dereito comparado, a doutrina xurídica, a realidade fáctica e as prácticas contractuais do sector. É todo un atropelo", resumiu Martín.