Despois da información do Reitor tomaron a palabra os vicerreitores e a xerente que informou de:

-          O día 15 incorporáronse os auxiliares de servizo.

-          O día 15 difundiuse a resolución sobre listas de espera de PAS funcionario

-          O día 18 ábrese o prazo de presentación da documentación de auxiliares administrativos que se incorporarán no mes de setembro.

-          Tamén se produce a incorporación de catro conserxes

 

Seguindo os puntos da orde do día aprobáronse:

-          A acta da sesión anterior cunha reclamación dos alumnos de IESGA.

-          Prazas de PDI contratado

-          Os cambios de dedicación solicitados polo PDI

-          As licenzas solicitadas polo PDI

-          Aprobáronse as solicitudes de profesores honorarios.

-          Creáronse as cátedras respectivas para que o PDI que se foi acreditando, e cumpría os requisitos (rexeitouse unha por non cumprilos), se promocionase.

-          Apróbanse os tribunais para as prazas anteriores.

-          Seguimos cos títulos propios de posgrao

-          Apróbanse as directrices e regulamento relativos ao traballo fin de grao

-          Fusiónanse os departamentos de Construcións Navais e Enxeñería Naval e Oceánica

-          Ao haber só unha candidatura para a Comisión de Reclamacións de prazas de PDI interino e laboral contratado, faise a súa proclamación.

-          E Chegamos á quenda aberta de intervencións:

 

IESGA le un documento no que, esencialmente protesta pola non inclusión dentro da orde do día da actual sesión do acordado e reflectido na sesión anterior.

“15. Votación para a elección de representantes dos estudantes do Consello de Goberno no Consello Social

Neste punto, o secretario dá conta da retirada de todas as candidaturas presentadas no Consello de Goberno do 31 de maio de 2011, tanto ao Consello Social como ao Consello de Estudantes universitario do Estado, polo que decaen os puntos de votación. Acórdase abrir un novo procedemento de elección para o vindeiro consello de Goberno.”
Tachan de grave o incumprimento.
 
Anxo Calvo (Decano da Fac. de Economía) indica que a conserxería do seu centro ten, na RPT en vigor, 3 auxiliares de servizo en quenda de mañá e 4 en quenda de tarde. Que neste intre quérese deixar sen cubrir o 4º posto na quenda de tarde.
Solicita a cobertura do dito posto por figurar na RPT actual, descoñece as razóns polas que non vai contemplar.
 
A Xerencia indica que o centro excede en dotación o número máximo de auxiliares de servizo en centros (fai unha referencia, tamén, ao INEF).
 
Anxo Calvo indica que o centro derivou unha parte da docencia á xornada de tarde, polo que a actividade durante esa quenda é moi grande. É o centro con máis alumnos. Solicita a reconsideración, insiste en que a praza está contemplada na RPT e a que virá poderá contemplala praza ou non.
 
Xerencia volve a indicar o exceso en comparación con outros centros e manifesta a posibilidade de que, si hai moita actividade en quenda de tarde se poida organizar o servizo pasando algunha praza da quenda de mañá á de tarde.
 
Xosé Portela reafirma o dito polo decano, indicando que mentres que a praza apareza na RPT debe ser, a todos os efectos, tratada como tal. Engade ao que indica o decano do centro que no concurso de traslados provisional en marcha a praza aparecía até o día de hoxe. Na modificación feita e publicada hoxe a praza desaparece.
 
Xerencia di que o sr. Portela sabe porque o falou con el, aínda que non comparta a modificación na RPT, que esa praza non sairía a concurso porque se ía trasladar de centro na vindeira RPT e que consideraba (ela) improcedente o feito de outorgar unha praza nesas condicións o que prexudicaría á persoa que puidese optar a ela. Di que a circunstancia de que aparecese na primeira convocatoria débese a un erro (difícil de entender que nas conversas mantidas co Comité e co seu presidente para a ampliación da convocatoria non se decatasen dese erro).
 
Xosé Portela. Polo que aparece na prensa aprobouse o plan de sustentabilidade (decálogo) que tanto a Consellería de Educación como o Partido Popular encárganse en expresar estes días, tamén na prensa, que é voluntario.
Canto máis se vai retrasar a RPT e canto supón para a UDC a sinatura dese plan?.
 
As convocatorias saen con excesivas correcións, a falta de axilidade e coherencia nalgunhas delas fai que a imaxe da institución sufra e a inseguridade se instale nos opositores/as.
 
Vicerreitor Angel Fernández. A UDC non ten constancia oficial do plan de sustentabilidade, non se pode facer caso a todo o que aparece na prensa (este asunto tratámolo noutro artigo). Para a UDC presupón 4.700.000€ aos que non vai renunciar.
 
Xerencia. Da RPT xa foron explicitados os seus contidos xerais
 
Xosé Portela, segundo o exposto no informe do reitor, e na prensa destes días, as tres universidades galegas asinaron co Consello Superior de Investigaciones Científicas un convenio para a cesión dun espazo para manter unha oficina de investigación en Bruxelas. Si se asinou este acordo xa debe estar desenvolvido o proxecto tanto no que se refire a funcións como de necesidades de persoal. Qué persoal se lle vai asinar?. En qué condicións?. Vaise posibilitar que traballadores/as actualmente en plantilla poida exercer nesa oficina?.
 
Sentíndoo moito tiven que saír cando o Sr. Reitor respondeu a esta pregunta, negándose, como é habitual nel, de malos modos a repetir a resposta.