A plataforma soberanista  destacou que é unha "vitoria política" poder levar a cabo a romaría que por quinto ano consecutivo organizaron para este día, despois de que o Concello de Santiago lles prohibise celebrala no parque Fermín Bouza Brey, por "cuestións de seguridade", e se visen obrigados a trasladala ao barrio santiagués de Vite, máis afastado do centro da cidade.
 
A este respecto, Aurelio Lopes considera que esta actuación pon de manifesto "a actitude fascista de Conde Roa --o alcalde compostelán, Gerardo Conde Roa--" e o seu "antinacionalismo", ao "negar" os seus dereitos políticos "mentres que as manifestacións fascistas teñen a súa autorización".
 
Como remate á forte campaña desenvolvida no último mes co lema “Por un novo ciclo no nacionalismo galego, adiante o autodeterminismo”, contra as 13:00 horas de hoxe deu saída da Alameda de Compostela a manifestación da Causa Galiza, que levou por quinto ano consecutivo a reivindicación soberanista ás rúas de Compostela. A marcha, encabezada por unha faixa co lema “Soberanía Nacional” portada por membros da portavocía e militantes da iniciativa, percorreu sen incidentes varias rúas da capital galega.
 
Ás 14:30, a manifestación rematou, como xa é tradicional, nunha ateigada Praza do Toural, onde os escritores Séchu Sende e Andrea Nunes actuaron de condutor dun acto político que deu comezo coa actuación de O Leo e Vero, do grupo Galegos no tempo dos Sputniks, e Bouba Pandereteiras cunha versión de “Venceremos nós” realizada especialmente para a ocasión. A continuación, Tino Lago deu lectura ao manifesto da marcha, no que se destacou que “a falta de soberanía está no cerne dos problemas sociais e económicos que asolagan ao Pobo Traballador Galego”. Para finalizar, a sindicalista Laura Bugalho lanzou unha arenga que denunciou que “somos todas e todos inmigrantes neste sistema colonizador español, somos inmigrantes no capitalismo, somos inmigrantes no heteropatriarcado”.
 
A organización manifestou que malia os atrancos do Concello de Compostela, un bo número de persoas apoiaron coa súa presenza a aposta soberanista de Causa Galiza, demostrando así a forza crecente da defensa do dereito da cidadanía alega a decidir o seu propio futuro, unha reclamación irrenunciábel do noso pobo que entronca coas necesidades económicas, culturais, lingüísticas e sociais do país. O manifesto lido na Praza do Toural que “a soberanía real abarca moito máis do que a consecución dun Estado propio”, polo que a aposta de Causa Galiza polo dereito de autodeterminación significa tamén a loita polo “eixe vertebrador para calquera transformación de fondo, para calquera cambio nas estruturas políticas e económicas que redunde na mellora das condicións de existencia dunha maioría social”. Neste sentido, chamouse ao conxunto do pobo galego a “tomar nas nosas mans o noso propio destino” para construir “unha Galiza ceibe e verdadeiramente popular”.
 
Ao remate da manifestación, a iniciativa realizou, a pesar da tentativa de prohibición, a tradicional romaría popular, trasladada nesta ocasión ao Burgo das Nacións, que contou ao longo da tarde con dúas sesións de discusión sobre política municipal, a primeira con representantes de candidaturas soberanistas galegas, e a segunda coa presenza das Candidatures d'Unitat Popular (CUP) e da Esquerda Abertzale. Houbo outras actividades ao longo da tarde como a presentación dos libros 'Um dia na minha vida' de Bobby Sands ou 'A revolución dos camaleóns', do comunista cubano Eddy E. Jiménez, e actividades deportivas.