A preocupación polo desemprego alcanzou o seu récord máximo en maio, momento en que era un rompedeiro de cabeza para o 84,1% dos enquisados. En marzo, era a primeira preocupación para o 83,9% dos cidadáns, mentres que en febreiro alcanzaba o 82,8% e en xaneiro a proporción foi do 82,4%.
 
Problemas económicos
 
Estes elevados valores rexistráronse despois dun trimestre de lixeiro descenso: no barómetro de decembro o paro era a maior dificultade do estado para o 78,6% dos enquisados, en novembro tamén o era para o 79,5% e en outubro, para o 81,1% da poboación. O segundo problema do país son as cuestións de índole económica para o 47% dos cidadáns, co que se demostra que a crise segue presente nos fogares.
 
Moi por detrás aparecen os políticos como terceira adversidade (24,7%) e a inmigración en cuarto lugar (11,8%). Menor preocupación causan a inseguridade cidadá (7,7%), a vivenda (7,2%), a corrupción (6,9%), o terrorismo (5,3%), o Goberno (4,6%), a educación (3,9%), os problemas de índole social (3,7%) e as pensións (2,6%). Entre os problemas que máis afectan persoalmente aos enquisados figuran o paro (44,5%), as cuestións de índole económica (39,5%), a clase política e os partidos (8,5%), a vivenda (7,1%), as pensións (6,7%), os problemas relacionados coa calidade do emprego (6,1%), a sanidade (4,5%) e a inseguridade cidadá (3,8%).
 
O optimismo polo chan...
 
En canto á situación económica actual, o 81,7% dos enquisados cre que se vive un momento "malo ou moi malo" e só un 1,5% considera que é "bo" e ninguén o valora como "moi bo". Non hai demasiado optimismo en que mellore, pois o 27% vaticina que dentro dun ano será aínda peor e só un 18,4% pensa que mellorará. Con todo, os que cren que mellorará son máis que en maio e os que vaticinan un empeoramento descenden lixeiramente. Tampouco é moi boa a valoración sobre a situación política que vive no estado nestes momentos. Para o 69,5%, a situación é "mala ou moi mala", mentres que un 2,4% a xulga "boa", e só un 0,2% atrévese a cualificala de "moi boa".
 
Dentro dun ano será aínda peor para o 22% dos cidadáns, se ben un 15,3% augura que o clima político mellorará. O resto dos enquisados estima que seguirá "igual". O CIS basea os resultados desta enquisa en 2.472 entrevistas realizadas en 240 municipios de 47 provincias entre os días 2 e 9 de xuño de 2011, unha vez celebradas as eleccións municipais e autonómicas de maio.