04/07/2011
CUTUDC / Novidades
ACTUALIDADE
A socialdemocracia tamén vendeu a Universidade
O equipo reitoral padece unha enfermidade moi común na socialdemocracia, aplicar políticas totalmente contrarias ao que se dí pretender.
-
Noticias relacionadas
Padece o mesmo síndrome que a socialdemocracia política que, pretendendo, en teoría, o estado de ben estar, aplica políticas que empobrecen e precarizan a clase obreira e as clases máis desfavorecidas mentres que o capital segue con ganancias nunca vistas, (en época de bonanza privatizaron os beneficios, cando hai crise socialízanse as perdas), este goberno monicreque nin sequera se atreve a lexislar medidas fiscais que poidan lesionar, dalgún xeito, os intereses dos que provocaron a crise, dedicándose a meter en cintura a traballadores/as, xubilados/as, parados/as e as clases máis desfavorecidas. Con tal de manter un sistema insolidario e inxusto non importa o sacrificio dos máis débiles.
Referíndonos, de novo, aos que gobernan a nosa Universidade, abonda revisar o seu programa electoral e facer balance. Nós xa o fixemos en varias ocasións no que respecta ao PAS.
Ímonos referir a outros aspectos que non por menos tratados teñen menos importancia e reflicten claramente o que sinalabamos ao comezo.
Boloña:
Tanto o sr. Reitor como o candidato a reitor pola agrupación que sustenta ao actual equipo reitoral manifestáronse publicamente e por escrito, contrarios á implantación do EEES (Espazo Europeo de Educación Superior). Non obstante o anterior asumiuse, sen ningún estertor a súa implantación.
A crise económica pon, unha vez máis, en evidencia este mesmo xeito de actuar
Decretazo (recorte salarial do 5%)
Aínda gabándose do estado “saneado” das contas da Universidade aplícase o decreto, non se reivindica a autonomía aceptándose a situación subsidiaria, tanto a nivel económico como político, do partido que goberne na Xunta.
Orzamentos de 2011 (aínda por aprobar, seica están só prorrogados os de 2010)
Dín, desde a Reitoría estar en contra dos ditos orzamentos, como proba do seu rexeitamento ensalzan a súa negativa a asinar o reparto para as Universidades Públicas Galegas, no que indican se discrimina á UDC.
Non obstante como “están dentro do sistema” non só acatan e aplican as directrices da Xunta senón que asinan un “plan de sustentabilidade”, non pensedes que é un plan para sustentar as Universidades senón que é para “racionalizar”, entre outras cousas, as plantillas (nel basearanse para eliminar, de facto, a RPT adeudada ao PAS laboral), vendendo, por arredor de 5 millóns de euros a xa pouca autonomía universitaria que actualmente mantén a institución.
Residencia Universitaria
De novo pronunciamentos, roldas de prensa, escritos…. Cando se lles pide que pasen á acción. Cando se lle reclama aos que nos gobernan que o compromiso que din manter coa residencia pública se transforme nun peche institucional que faga patente diante da Xunta o rexeitamento da privatización pola Comunidade Universitaria, de novo, un paso atrás. Esa medida xa non entra dentro da óptica dos que nos gobernan. En definitiva faise unha defensa ritual do público pero non se quere “molestar” aos que nos gobernan. Entre o “quero pero…·” e o apoio á medida tomada por Feijoo realizado polo presidente do Consello Social, temos o peixe vendido.
Contra a socialdemocracia política que aplica as medidas máis neoliberais da historia fixemos na Galiza dúas folgas xerais.
Contra a socialdemocracia universitaria, temos que tomar o temón, indignarnos e pasar tamén á acción
CUT da UDC . SEMPRE DO LADO DAS TRABALLADORAS E TRABALLADORES
Quen somos | Contacto | Axuda
cutudc.com, 2009. Publicado baixo licencia Creative Commons DHTML Menu By Milonic JavaScript