O ano 2011 está a ser en termos económicos o peor da historia da Universidade de Vigo e “2012 "non" será mellor", afirmou onte o seu reitor, Salustiano Mato, na presentación do balance do último curso e dos plans do próximo, marcados ambos os dous polo arranque do Campus do Mar, "un concepto moi amplo que implica a todos os sectores, espazos e oportunidades" e que converteu a institución viguesa nunha referencia en Europa. "Recoñecen que temos algo que dicir", oufanouse Mato.
 
O Campus do Mar recibiu este ano nove millóns de euros e está previsto que o próximo sume outros 10 millóns para infraestruturas. A busca de ingresos é para a universidade máis importante que a austeridade, segundo o seu reitor, que formulou a necesidade de que a Xunta manteña o seu nivel de financiamento (65% do gasto) como "osíxeno para respirar e para seguir facendo os deberes". A institución está a cumprir o plan de sostibilidade, reduciu o déficit e os ingresos, que busca incrementar, xa superan os previstos.