"A vinculación dos salarios e a produtividade é un dos elementos básicos do funcionamento da economía, tanto a nivel macroeconómico coma de postos de traballo," observou Campa na súa comparecencia ante a comisión correspondente do Congreso.
 
Por este motivo, dixo que "o grande avance que dá a reforma da negociación colectiva" aprobada o pasado venres é que outorga maior preponderancia aos convenios empresariais en aspectos como o deseño de políticas salariais, de xornadas, ou a mobilidade funcional.
 
Xunto á flexibilidade interna, esta vinculación "é a grande arma coa que contan as nosas empresas para o seu crecemento", dixo Campa, polo que confiou en que cada vez sexa máis común nos próximos dous anos.
 
Pola súa banda, o presidente da CEOE, Juan Rosell, dixo en Santander hoxe que " hai que esquecerse para sempre "dos salarios fixos "indexados" co IPC e falar de conceptos variables, entre os que citou o absentismo laboral, que o empresario podería repercutir nos soldos. Rosell dixo que "hai moitas maneiras para poder incentivar a produtividade".
 
Así, entre os conceptos variables á hora de fixar a produtividade e fixar os salarios, citou os beneficios das empresas, o grao de flexibilidade interna, o investimento e o índice de absentismo laboral. Na súa opinión, a produtividade é un "concepto subsectorial" xa que é moi distinta nunha fábrica de automóbiles, a unha de camións ou de motocicletas.
 
Situou o absentismo en España en torno ao 1% do PIB e afirmou que os empresarios non queren xente que defraude non pagando impostos ou á Seguridade Social, nin que poña pexas para ir a traballar e obteña as baixas sen suficiente "lóxica".
 
En canto ao prezo do despedimento, insistiu nun contrato indefinido como o que se aplica en Europa, con 20 días por ano traballado durante un ano como máximo.
 
Insistiu na necesidade de novas regras no mercado laboral para o futuro porque, sinalou, a pesar de que gañaron moitos dereitos "agora toca unha época de responsabilidade" na que ninguén debe esperar que lle dean "nada" dende o exterior.
 
Engadiu que nun contexto internacional competitivo a lexislación laboral é "filla do franquismo e neta da República" e quedou antiga.
 
Eles téñeno clarísimo, a crise ímola pagar a clase obreira. Nós tamén o temos claro, fronte a súa descarada intención só cabe a mobilización.