O Alto Tribunal, estes días protagonista pola renuncia de tres dos seus membros, non perde o tempo: sempre hai un oco para unha sentenza en contra dos traballadores.
 
O Tribunal Constitucional considera que o recorte salarial decretado en maio de 2010 polo Goberno do PSOE para os empregados públicos, non vulnerou dereitos fundamentais como o da negociación colectiva, como formulou a Audiencia Nacional en outubro do ano pasado.
 
Nun auto, os maxistrados do Constitucional rexeitaron admitir a trámite a primeira cuestión de inconstitucionalidade que formulou por este asunto a Audiencia Nacional, ao coincidir co Ministerio Fiscal en que é "notoriamente infundada".
 
O máximo garante da Constitución Española explica que "é o convenio colectivo o que debe respectar e someterse non só á lei formal, senón, máis xenericamente, ás normas de maior rango xerárquico e non ao contrario".
 
Así, conclúe que o decreto lei, que implicou que os convenios colectivos das empresas públicas fosen reformados para introducir unha baixada do 5% nos salarios, non vulnerou o dereito á negociación colectiva porque a intanxibilidade ou inalterabilidade do convenio colectivo non é un dos seus "elementos esenciais".

Sinalar, non obstante, que hai aínda autos de xulgados do contencioso administrativo que, ademais dos elementos sinalados no inicial da Sala do Social da Audiencia Nacional (obxecto do Auto do Constitucional filtrado aos medios de comunicación), que cuestionan a constitucionalidade do recorte salarial dende outros enfoques. Así, cuestionaron a razón de urxencia esixible para utilizar a vía do Real Decreto en calquera disposición gobernamental con rango de Lei, o seu carácter confiscatorio, os seus efectos retroactivos "de facto" ou a inconstitucionalidade das leis autonómicas de desenvolvemento e aplicación do RDL 8/2010, por extralimitación da súa capacidade normativa.