A solicitude está incluída nas recomendacións que o Executivo comunitario dirixiu ao Estado español de face á elaboración dos orzamentos e o plan de reformas para 2012. Estas recomendacións, que serán aprobadas no cume de líderes europeos do 23 e 24 de xuño, constitúen unha das medidas decididas pola UE os últimos meses para mellorar a coordinación económica entre os gobernos e previr futuras crises.
 
Bruxelas destaca que o Estado español rexistrou un “forte incremento” dos custos laborais unitarios desde finais dos 90, o que se traduciu en máis inflación e unha perda de competitividade. “Atopar marxe para reducir o nivel relativamente alto das contribucións sociais co obxectivo de baixar os custos laborais non salariais axudaría a impulsar a competitividade”, apunta.
 
A Comisión resalta que “os impostos sobre a enerxía, especialmente sobre os carburantes, son relativamente baixos no Estado español e poderían ser unha forma de compensar os ingresos”, e defende “modificar a estrutura e os tipos do IVE”.
 
O Executivo comunitario reclama ademais ao Goberno aprobar a reforma da negociación colectiva e modificar as cláusulas de revisión salarial “para garantir que o crecemento dos salarios reflectir mellor a evolución da produtividade, así como as condicións a nivel local e da empresa”.
 
Bruxelas pide tamén ao Estado español que avalíe o impacto da reforma laboral aprobada en decembro de 2010 e que, se os resultados son negativos, faga máis reformas no mercado de traballo para reducir a temporalidade e mellorar o acceso dos mozos ao mercado de traballo.
 
En materia de consolidación fiscal, a Comisión recomenda ao Estado español que adopte máis medidas de axuste en 2011 e 2012 se as previsións económicas do Goberno non se cumpren para garantir que se respecten os obxectivos de déficit. Bruxelas ve “demasiado favorábeis” os datos de crecemento que manexa o Goberno para 2011 e 2012.
 
Europa cre que a economía española crecerá este ano só un 0,8% e un 1,5% en 2012, fronte ao 1,3% e o 2,3% que espera o Goberno. Por iso, Bruxelas prognosticou que o déficit español situarase este ano no 6,3%, tres décimas por encima do obxectivo, e no 5,3% en 2012, case un punto por encima do 4,4% ao que se comprometeu o Goberno.
 
O Estado español debe “garantir que se cumpran os obxectivos de déficit en todos os niveis de goberno, aplicando estritamente os mecanismos de control do déficit e da débeda para as comunidades autónomas”. Ademais, reclama que se adopte tanto a nivel nacional como nas autonomías unha regra que limite o aumento do gasto por baixo do crecemento do PIB.
 
En materia de pensións, Bruxelas solicita a aprobación final da reforma que atrasa a idade de xubilación aos 67 anos e unha cláusula de revisión para axustar “regularmente” a idade de xubilación á esperanza de vida. Nas súas recomendacións, a Comisión pide “reforzar a reestruturación en marcha do sector das caixas de aforro afrontando os puntos débiles que quedan na súa estrutura de goberno”.
 
Demostran todas estas condicións que o Estado español está intervido, de facto, que a autonomía do goberno non existe e que non tardará moito en aplicar  dilixentemente as instrucións recibidas.
 
A decisión está tomada e estase a levar á práctica, a clase obreira será a que pague os efectos da crise que non xenerou, os ricos, os poderosos, o capital segue gozando de vacacións fiscais, ningunha actuación vai dirixida, nin tan sequera, a limitar as súas ganancias, todo o contrario, para o seu beneficio tamén se desmantela a administración abrindo novos nichos de negocio e fortalecendo os que xa estaban consolidados.
 
A desvergonza é de tal calado que empresas con millonarias ganancias están a desprenderse de miles de traballadores (telefónica, Emesa…) sen custo relevante e con cargo ao erario público, primando a deslocalización a mercados laborais onde a ganancia sexa maior.
 
Temos un goberno plegado absolutamente aos intereses do capital que pon en xogo constantemente a pervivencia dos dereitos que como clase conquistamos até o momento. Nas nosas mans está o impedirllo. Mobilicémonos.