A CIG ameaza con levar ante a Inspección de Traballo e con presentar unha denuncia nos xulgados polo despedimento de cinco empregados da empresa coruñesa de consultoría Altia vinculados ao sindicato nacionalista e con dez anos de experiencia. A CIG pide a compañía que "rectifique e recoloque estas cinco persoas", que ían nas listas do sindicato nas eleccións para designar un comité de empresa. Fontes de Altia consultadas polos  xornais admiten a rescisión de contrato a cinco empregados pero negan que se trate de "unha persecución sindical" e riscan de "totalmente falsas" as acusacións do sindicato.
 
O secretario de Organización de CIG-Compostela, Renato Núñez, criticou en rolda de prensa que, antes dos despedimentos, Altia fixo públicos uns beneficios de 1.680.000 euros en 2010, un 15% máis que en 2009. Por eses sostén que a decisión de levar a cabo estes despedimentos se debe "ou a que a empresa non ten unha situación tan boiante e os resultados son mentira ou ás eleccións sindicais". Altia asegura que as contas son reais e que non ten constancia de que estes traballadores fosen nas listas das eleccións sindicais, que serán en xullo.
 
Como dubidamos de tamaña casualidade, despedir xusto aos traballadores dunha candidatura, e como as eleccións están próximas e a empresa seguro que coñece os “movementos” para a formalización de candidaturas, non nos cremos a súa argumentación.
 
Desde aquí a nosa solidariedade cos traballadores despedidos e reclamamos da Universidade a rescisión dos contratos con esta empresa.