O ex director xerente do Fondo Monetario Internacional (FMI), Dominique Strauss-Kahn, recibirá tras a súa saída abrupta do organismo, arrestado acusado de agresión sexual, unha indemnización de 250.000 dólares (uns 175.000 euros), ademais dunha pensión vitalicia non especificada.

O FMI confirmou que, tal e como informaran previamente algúns medios financeiros, o ex director xerente percibirá un único pagamento compensatorio de 250.000 dólares.

O organismo tamén recoñece que o economista francés -acusado de varios delitos de asalto sexual e intento de violación- percibirá unha pensión vitalicia, pero nega a contía que mencionan os medios financeiros, e que a sitúan entre 250.000 e 320.000 dólares anuais (entre 175.000 e 225.000 euros).

As cifras que deron os medios sobre a pensión anual e outros emolumentos do director xerente "foron sobreestimadas enormemente", ao parecer porque a prensa tomou "erroneamente como base do cálculo o pagamento dunha indemnización dunha soa vez por importe de 250.000 dólares", dixo o FMI nun comunicado.

"A pensión anual que cobrará (Strauss-Kahn) nos próximos anos será moi, moi inferior a esa cifra", engadiu o organismo.

Suplemento de retiro

Segundo os termos do contrato que Dominique Strauss-Kahn asinou cando se incorporou ao cargo en novembro de 2007 e dispoñible na páxina web do organismo, o economista francés ten dereito a participar dos plans de pensións do FMI, como calquera empregado que traballase alí polo menos tres anos.

O documento establece que cobrará ademais un "suplemento de retiro" que se sumará á pensión, e que segundo unha táboa adxunta supoñerá o 60% das súas remuneracións.

Medios como ABC News recordan que o seu salario é de 420.930 dólares (296.000 euros) anuais, o que supón que o suplemento que podería cobrar ascendería a uns 252.000 dólares.

Outros, como CNBC, calculan que nestes tres anos o seu salario se incrementou pola inflación ata os 530.000 dólares anuais (372.000 euros), polo que o suplemento de retiro podería ascender a uns 318.000 dólares (uns 223.000 euros) ao ano.

O contrato establece por outro lado que "en caso de que (Straus-Kahn) faleza antes que a súa esposa tras abandonar o Fondo, o Fondo pagará á súa esposa durante toda a súa vida un pagamento suplementario de retiro".

Unha bicoca. Dende logo, no mundo hai dúas clases de cidadáns: os Amos do Universo, como DSK, e o resto de pobres mortais. Xa estabamos indignados, isto é unha razón máis para actuar.