A Comisión Europea ameazou hoxe a seis países, entre eles o estado español, cunha denuncia ao Tribunal de Xustiza da UE, por incumprimento da directiva que intenta aumentar a solvencia dos bancos e atallar os "incentivos salariais perversos" dos directivos das entidades.

Bruxelas deu dous meses a Zapatero, Grecia, Italia, Polonia, Portugal e Eslovenia para empezar a aplicar a directiva sobre requisitos de capital bancario, que deberían ter implementado xa o 1 de xaneiro deste ano, segundo informou a CE nun comunicado.

A CE enviou a estes países un ditame motivado -segundo paso do procedemento de infracción comunitario, previo á denuncia ante o Tribunal de Xustiza da UE- para requirirlles que modifiquen as súas respectivas lexislacións.

"A Comisión Europea esixe ao estado español, Grecia, Italia, Portugal, Polonia e Eslovenia que notifiquen no prazo de dous meses as súas disposicións de aplicación de normas importantes relativas á adecuación do capital e a política de remuneracións das entidades financeiras que se recollen na Directiva", sinala o comunicado.

O obxectivo da directiva sobre requisitos de capital é "garantir a solvencia financeira dos bancos e sociedades de investimento, así como atallar a excesiva e imprudente asunción de riscos no sector bancario favorecida por unhas remuneracións mal concibidas".

Trátase de "incentivos salariais perversos" que, segundo recorda a CE, provocaron "a quebra de distintas entidades e trouxeron problemas á sociedade no seu conxunto".

A directiva, que aínda non aplica no estado, avoga por "esixir aos bancos e sociedades de investimento que apliquen políticas de remuneración solventes que non estimulen ou premien as asuncións de riscos excesivos", di Bruxelas.