As novas recomendacións internacionais van facer que a retribución variable dos directivos do Santander estea máis condicionada e diferida no tempo, pero non por iso vai ser menos substancial. A xunta de accionistas do maior banco da zona euro aprobará o próximo xuño con case toda probabilidade catro plans de incentivos para os seus directivos que en total roldan os 485 millóns de euros.

O máis substancial é o chamado plan de retribución variable diferida e condicionada, do que se beneficiarán os 250 conselleiros executivos e altos directivos do banco. Este grupo percibirá un máximo de 165 millóns en accións e outros 165 millóns en metálico. O máis normal é que a cantidade final sexa algo inferior a eses 330 millóns, xa que é o tope que recibirían se se lograsen todos os obxectivos.

A novidade é que ese bonus correspondente ao 2011, en lugar de recibilo de maneira total no 2012, percibirano en parte ata o 2015. Unha medida coa que se busca que asuman menos risco. Dos 330 millóns, ata 35 millóns corresponderían ao presidente, Emilio Botín, ao conselleiro delegado, Alfredo Sáenz, e aos conselleiros executivos Francisco Luzón, Ana Patricia Botín, Matías Rodríguez Inciarte e Juan Rodríguez Inciarte.

Ademais, uns 6.500 directivos recibirán ata 155 millóns en accións no 2014.