A empresa adxudicataria que pase a xestionar os centros Concepción Arenal, na Coruña, e o Monteledo en Ourense, deberán executar as medidas xudiciais en réxime pechado, semiaberto ou aberto, así como manter o servizo de asistencia os fins de semana. Pola contra, o centro de Atención Específica Montefiz, en Ourense, acollerá internamentos terapéuticos de mozos conflitivos ou para casos de adicións ou disfuncións físicas.

En total 88 prazas de menores aos que a empresa adxudicataria deberá procurar unha alimentación “equilibrada e variada”, ademais de vestiario –sempre que os mozos non opten por utilizar a súa propia vestimenta– ou “pagas de cartos de peto”, que segundo explica a Xunta “estarán orientadas ao mellor cumprimento das medidas que se establezan”.

Entre as condicións que esixe a Consellería de Traballo é que a empresa acepte a “a alumnos universitarios en prácticas das carreiras de Educación Social, Traballo Social, Psicoloxía, Pedagoxía, Psicopedagoxía e aquelas que teñan relación co servizo”. Neste sentido, a Xunta tamén establece que os centros Concepción Areal e Monteledo dean traballo a 35 profesionais destes campos cada un, mentres que no caso do centro de Atención Específica de Montefiz, a empresa deberá contratar a 39 persoas.

A Xunta destinará outros 604.500 euros para a concertación doutros cinco centros –en A Coruña, Lugo, Ourense, Pontevedra e Vigo– nos que os menores maiores de 14 anos poidan cumprir coas medidas “impostas nos xulgados de menores”.

Estes centros, nos que as adxudicatarias atenderán en total a un máximo de 50 persoas, deberán coordinar as medidas xudiciais, realizar as funcións dun centro de día, dinamizar e implantar programas educativos, acompañar, educar e orientar no proceso de maduración dos mozos, axudar a resolver situacións conflitivas entre adolescentes ou reforzar o proceso educativo.

Traballo tamén establece diferentes parámetros que deben cumprir os diferentes establecementos. Así, o centro da Coruña deberá dar servizo a dez rapaces cun persoal de 13 persoas. Pola contra, os catro restantes atenderán ao mesmo número de menores pero con menos da metade de persoal: tan só cinco. Neste sentido, a Xunta establece que de oito da maña a oito da noite deberá haber un educador no centro, que estará localizable os fins de semana.

Un paso máis na privatización da administración pública galega, o PP, acabará privatizándoo todo. A idea que a dereita e a socialdemocracia ten do público plásmase día a día nas medidas que, desde o estado e da comunidade se toman a este respecto.

Está claro que para os que gobernan a atención ao cidadán e un elemento moi secundario, as decisións que toma van por ese camiño. Ábrese, deste xeito, un novo nicho de negocio para as empresas privadas, iso si sempre a costa dos administrados que, a cada paso, padeceremos uns servizos menos eficientes e máis caros.