O FMI explica que o desemprego "aumentou notablemente en países como o estado español e Irlanda, onde se contraeu severamente a actividade no sector da construción despois de que explotase a burbulla inmobiliaria e deixase sen emprego moitos traballadores con baixa cualificación". Ademais, os traballadores con contratos temporais soportaron a maior carga do axuste e a taxa de desemprego a longo prazo aumenta. Como consecuencia destes axustes na poboación nova, o FMI prevé perdas de capital humano, aumentos da desigualdade, o que supón unha ameaza para a cohesión social e a estabilidade de Europa. "España rexistra aínda unha significativa corrección no mercado inmobiliario que dificultará o consumo a curto prazo", segundo o FMI.

O organismo internacional prevé que o estado crecerá un 0,8 % este ano e un 1,6 % o próximo, dous e unha décima máis respectivamente do que prognosticou en xaneiro.

No estado, as deprimidas perspectivas continúan pesando nas decisións de investimento. Por un lado recoñece a existencia dunha xeneración perdida pola falta de emprego, po outro o FMI recoñece que o fortalecemento das reformas, que provocan esta situación, permitiron afastarse doutros países periféricos da zona do euro a comezos de 2011. O FMI destaca que nalgúns países como o estado español e Grecia iniciouse unha guerra polos depósitos comerciantes polo miúdo, que creou presións insostibles nas marxes de interese. Tamén fai fincapé na dependencia do financiamento do Banco Central Europeo (BCE) de case todos os bancos en Grecia, Irlanda e Portugal, así como das caixas de aforro de aquí. Ao financiarse a través do BCE, financiámolas entre todos e todas o que provocará máis déficit público porque haberá que aportar máis diñeiro as arcas do BCE.

O FMI reduciu en catro décimas a súa proxección de déficit público para o estado español, que segundo o organismo será do 6,2 por cento do PIB este ano, fronte ó 6,6 por cento que prevía en xaneiro. O rebaixe das espectativas repercutirá negativamente en toda a esfera pública, se non se cumpren as previsións asistiremos, unha vez máis e debido ás políticas de aforro, á perda de peso do sector público, podendo incluír neste paquete o salario dos traballadores/as da administración pública.