Patronal e sindicatos maioritarios xa cociñaron o acordo sobre negociación colectiva, coa escusa da campaña electoral non queren facelo público até despois do 22 de maio.

Temos claro que desas negociacións non sairá nada beneficioso para os traballadores e traballadoras. Os postulados de partida confirman que os sindicatos asumiron que a situación económica é crítica e, como muleta do sistema que son, prestáronse raudos a poñer, da súa parte, o que faga falta para que aos empresarios e ao capital non lle custe moito a saída.

O acordo sobre pensións (o pacto social) ten a súa continuación no acordo sobre negociación colectiva.

Os “negociadores” acordaron retrasar a sinatura do acordo para non interferir no desenvolvemento da campaña electoral, sinal de que o “acordo” será tan malo que temen cabrear a todo o colectivo de traballadores e traballadoras do estado o que redundaría nunha maior abstención ou nunha maior radicalización do voto.

As urxencias que o goberno ten en arranxar este tema como parte das políticas impostas desde os grupos de poder capitalista e desde os dos gobernos europeos que reclaman máis contención e sacrificios no territorio do estado parece que, neste caso non son suficientes para que o acordo xa pactado se faga público.

Temos claro, desde o noso sindicato, que ás negociacións non se pode ir coas mans baleiras, os representantes dos traballadores, antes de principiar as negociacións teñen que tensar as forzas par sentarse na mesa de negociación abalados pola mobilización e pola forza que da a unidade de clase. Neste caso temos claro que o sindicalismo que representamos está a anos luz do que representan os sindicatos pactistas sabemos que a opción sindical que representan só traerá, para a clase obreira, máis retrocesos e desesperanza. Pedimos a todos os traballadores e traballadoras máis conscientes que se aproximen e se integren dentro do sindicalismo asembleario e reivindicativo que representa a CUT.