09/05/2011
CUTUDC / Novidades
ACTUALIDADE
A USC suspende temporalmente o máster de Enxeñería Industrial de Lugo
A decisión da USC ven precedida da denuncia de Asociacións de Enxeñeiros Industriais do estado e pola Universidade da Coruña. A guerra polos títulos, forma xa parte da campaña electoral. O alcalde de Lugo, José López Orozco, pediu aos lucenses que salgan na defensa do máster de Enxeñería Industrial que se imparte na facultade de Ciencias, dado que «favorece aos alumnos de Lugo e supón unha aposta polo coñecemento».
-
Noticias relacionadas
A Universidade de Santiago de Compostela (USC) decidiu que o ano vindeiro non vai dar cabida ao novo Máster de Enxeñería Industrial da Facultade de Ciencias de Lugo, denunciado ante os tribunais pola Universidade da Coruña (UDC) e a Federación de Asociacións de Enxeñeiros Industriais. Isto é así porque a USC decidiu suspender de forma temporal este título, polo que o próximo curso non o ofertará para alumnos de novo ingreso, aínda que os que xa estean matriculados si poderán finalizar os seus estudos.
A decisión chega pouco despois de que o Consello Xeral de Colexios Oficiais de Enxeñeiros Industriais emitise un comunicado no que denunciaba que a Facultade de Ciencias de Lugo «non dispón do profesorado requirido para impartir» o máster, ademais de aconsellar aos alumnos xa matriculados que abandonasen os estudos e advertir de que non colegiaría aos seus titulados.
Ademais de responder ás peticións dos colexios profesionais, a suspensión temporal do título de Ciencias veu a colmar tamén as reivindicacións da Escola Politécnica de Esteiro, que desde o principio se mostrou en contra do mesmo, por considerar que a Facultade de Ciencias non está preparada para impartir un máster en Enxeñería Industrial con atribucións profesionais, algo para o que, na súa opinión, si está capacitado o centro ferrolán, así como a Escola de Enxeñería de Vigo.
Tras a suspensión temporal do máster, a USC abrirá agora unha fase de estudo da memoria do máster, a fin de «corrixir» as deficiencias detectadas nela, «xa que presenta unhas necesidades que agora non se poden cubrir». Unha vez reformada e corrixida esa memoria, a USC talvez podería volver ofertar o máster a novos alumnos no curso 2012-2013.
Pola súa parte López Orozco ,o rexedor do Concello de Lugo brindouse a botarlle unha man á universidade, se fose necesario, para garantir a continuidade do máster en Lugo. E xustificouse dicindo: «Porque nos logros que conseguimos non debe haber marcha atrás».
Orozco expresou o apoio do Concello á continuidade do máster. Manifestou que xa falou do tema co vicerreitor, Pedro García Herradón, e tamén o vai a facer co reitor, Juan Casares, para pedirlle que «a universidade faga un esforzo co obxecto de que ese máster se manteña na cidade e que sexa de calidade, o que é compatible co traballo que desenvolve o campus de Lugo».
O rexedor indicou, tamén, que o esforzo económico que supón a formación académica dos universitarios debe acompañarse de medidas para que os alumnos non teñan que buscar traballo fóra de Lugo.
López Orozco recordou que o Concello lle ofreceu a súa colaboración á Xunta «para que se instalen empresas nas Gándaras e por iso pedimos que rebaixe o prezo do solo das parcelas non novo polígono empresarial».
De momento, non se sabe que vai pasar co máster de Enxeñería Industrial dado que a universidade aínda non deu por definitiva a súa suspensión. Segundo dixo o vicerreitor de Coordinación do campus, Pedro García Herradón, a razón de que se estea estudando a viabilidade do máster é que «temos que garantir que as titulacións que impartimos na universidade teñan unha calidade acorde co prestixio da USC».
OUTRO APOIO MÁIS. Acordo da Deputación
A xunta de goberno da Deputación ratificou onte a proposta, presentada polo vicepresidente nacionalista, Antón Bao, de solicitar á universidade de Santiago de Compostela que garanta o mantemento do máster de enxeñería industrial para asegurar que o profesorado, o estudantado e o persoal investigador continúen desenvolvendo a súa actividade no campus. O acordo será trasladado ao reitor, Juan Casares Long.
CUT da UDC . SEMPRE DO LADO DAS TRABALLADORAS E TRABALLADORES
Quen somos | Contacto | Axuda
cutudc.com, 2009. Publicado baixo licencia Creative Commons DHTML Menu By Milonic JavaScript