A Organización de Consumidores e Usuarios (OCU) considera que "unha gran maioría de cidadáns non soportaría outro incremento do prezo da electricidade" este ano e entende que as subidas do 18% en 2010 e de case o 11% en xaneiro son "máis que suficientes".

Nun comunicado, a organización asegura que desde 2008 a tarifa encareceuse un 50%, o que equivale a unha media de 235 euros máis ao ano por consumidor, mentres "os españois non perciben ningunha mellora neste servizo" nin en termos de "calidade" nin de "competencia ou transparencia".

A OCU considera ademais que a formulación de Iberdrola acerca de posibles subidas de luz é unha "completa desvergoña e unha tomadura de pelo para todos os usuarios, que viron como se duplicou a súa factura en só dous anos".

A asociación asegura que Iberdrola pediu ao Ministerio de Industria novas subidas da luz e considera "inadmisible" que a eléctrica anuncie un beneficio neto de 1.014 millóns de euros no primeiro trimestre do ano e ao mesmo tempo avogue por incrementos da tarifa.

Na conferencia con analistas de onte, Iberdrola considerou que o Ministerio de Industria deberá trasladar este ano ás tarifas eléctricas o encarecemento do custo da enerxía, que previsiblemente se producirá, se quere que non se exceda o límite de 3.000 millóns de euros de déficit tarifario fixado como tope polo Goberno para 2011.

"A OCU espera unha resposta contundente do Ministerio de Industria fronte a esta provocación que a compañía fai a todos os usuarios e pide que non se pliegue ás súas esixencias e defenda os intereses de todos os cidadáns", asegura.

Por último, anima aos usuarios que aínda non o fixesen a que se somen á campaña "Stop á subida da luz", coa que se solicita a conxelación de tarifas e o mantemento da Tarifa de Último Recurso (TUR) nas condicións actuais, polo menos, ata que a economía española salga da "grave situación" na que se atopa.