abril de 2011
 
 

18/04/2011

   CUTUDC / Novidades

  ACTUALIDADE

Resumo do Consello de Goberno do 14/04/2011

Unha condensación do resumo podería ser:

Consensúase unha resolución sobre a Residencia Universitaria.

Catro PDI promocionaron, está claro, non hai discusión establécese nos acordos entre as partes (Universidade-traballadores)

Informouse na sesión de que esa mesma mañá publicouse o Convenio Colectivo de PDI laboral asinado no mes de xaneiro deste mesmo ano, as partes gabáronse de superar os marcos orzamentarios establecidos pola Xunta “custou pero saiu”.

O PAS laboral ve como na FCDEF redúceselle unha praza e advírteselle, despois da intervención do representante no Consello de Goberno, de que a RPT que se lles presentará non se parecerá á que foi ás asembleas, neste caso si afectará a redución orzamentaria.

 

 

Resumo do Consello de Goberno do 14/04/2011

Punto 1.- Informe do Reitor:

Esta Universidade ten un Campus de Excelencia que comparte coa Universidade de Vigo e Santiago. Constituíuse o Órgano Reitor e o Consello de Dirección no que hai representación da UDC.

A UDC xa preparou a candidatura ao Campus de Excelencia de próxima convocatoria. Denominarase Campus T (que engloba tecnoloxía e territorio).

A idea é reforzar a proposta de campus xa presentada na anterior convocatoria. Ten xa varias universidades agregadas e cóntase que se sumen as de Castela-León.

O 7 de marzo houbo reunión do Consello Galego de Universidades. Tratándose, esencialmente, os Máster. Avánzase no novo decreto que regula os títulos universitarios, acórdase que os máster con menos de 5 alumnos nos dous últimos anos desaparezan ( a UDC non ten ningún caso). Os de entre 5-10 alumnos desaparecerán aínda que este ano se manteñen.

Enxeñería da Edificación (antigo título de arquitecto técnico ou aparellador). Hai unha sentenza xudicial que establece que a denominación do título pode levar a confusión. O Colexio de enxeñeiros demandou esa denominación en varias universidades, incluída a UDC. O ministerio é o que ten que defender a denominación dos estudos.

Xerenta:

Constituíuse a Xunta de Persoal.

A Universidade participa na comisión interuniversitaria de intercambio de PAS, a Universidade da Coruña oferta dúas prazas, ao non ser solicitadas cubriranse por persoal interino.

Punto 2.- Lectura e aprobación, se proceder, da acta da sesión do 25 de febreiro de 2011.

Disinto do parágrafo que di:

“Na súa quenda de informe, o secretario xeral toma a palabra para indicarlle aos membros do Consello de Goberno que pese á reiteración das advertencias feitas nos Consellos de Goberno do 22 de xullo e do 4 de outubro a D. Xosé Portela, este volveu remitir a documentación correspondente á presente sesión do Consello de Goberno a todo o PAS da Universidade da Coruña. Tal comportamento vulnera o artigo 7 do Regulamento interno do Consello de Goberno, aprobado por este na súa sesión do 16 de marzo de 2005, de conformidade co cal a convocatoria que inclúe a documentación, é notificada individualmente aos membros do Consello de Goberno, mais nin é pública, nin pode ser difundida publicamente…”

Indico que cando se me negou a posibilidade de difundir as ordes do día e documentación que inclúen en ningún caso se fixo mención ao artigo que se indica. Houbo incluso algún director de departamento que indicou que el facía, entre os membros do departamento difusión das ordes do día ao mesmo nivel ca min, indicándoselle que podía facelo.

Quedei en aportar as actas dos días sinalados para maior verificación.

Indico, unha vez máis, que a miña representación non é unipersoal e que teño que ter a posibilidade de que, os representados, coñezan os temas a tratar para que poidan facer as aportacións que consideren oportunas.

O Reitor di que na documentación hai temas que si se difunden incórrese en delito pola Lei de protección de datos.

Indícaseme claramente que por medio da lista PAS non poderei difundir as convocatorias e documentación. Si o fago por outras vías a responsabilidade será miña.

Fago que conste a miña primeira apreciación á acta.

Teño que dicir, á marxe do xa sinalado, que neste Consello de Goberno censurouse a posibilidade de que difundira a orde do día.

Punto 4.- Calendario académico 2011-2012

Establécese que nas datas de avaliación non haberá docencia. A docencia rematará un día antes de comezar as datas de avaliación.

Representante de PDI laboral: pide que se estableza que é docencia e que non o é (as titorías forman parte da docencia?). Pide que se negocie cos traballadores (PDI) o calendario.

O calendario entra en conflito coas probas de selectividade. Ínstase a que se resolva.

Indica que hoxe, despois dunha pelexa importante coa Xunta, publícase o Convenio Colectivo de PDI laboral o que debe ser unha satisfacción para os traballadores e para a institución.

Punto 5.- Proposta de límite de prazas curso 2011-2012

Os alumnos (Comités) insisten en que se posicionan en contra do límite porque entenden que na universidade deben ter cabida todos os mozos e mozas que desexen prepararse e matricularse nela. En todo caso a institución debe proceder ás adaptacións necesarias e aos incrementos de efectivos precisos para recibir aos alumnos que desexen estudar nela.

Responde a Vicerreitora que a universidade debe ofertar estudos e asegurar a calidade dos mesmos, ofértase o máximo posible asegurando esa condición.

Procédese á votación rexistrándose 5 votos en contra da limitación nos que se inclúen os nosos.

Punto 6.- Denominación de títulos propios.

Trátase da titulo superior de arquitectura de interiores. A denominación non gusta a unha gran parte do Consello porque induce a erro. O director da Escola de Arquitectura móstrase contrariado e os alumnos votan en cara que non se tratase cos afectados.

Quédase en que, no vindeiro Consello, se tomará a decisión agardando as aportacións que os membros fagan ao respecto doutra posible denominación.

Punto 7.- Prazas de profesorado.

Infórmase da promoción de 3 prazas de PDI contratado e 1 de PDI funcionario.
Xustifícase en que está acordado.

Punto 10.- Renovación de profesorado emérito.

Un dos profesores eméritos (non vou dicir o nome por iso da Lei de Protección de Datos) solicita a renovación da súa condición de profesor emérito. Os alumnos indican que, en época de crise e cos recortes económicos que se teñen que tomar, parece ilóxico que se lle renove a esta persoa esa condición pola que percibe un importante salario (tendo en conta que xa cobra a pensión).

Un membro do PDI indica que hai moitas formas de colaborar coa Universidade sen ser a través desta figura e pide que se vote como se fixo na anterior ocasión que o solicitou.

Pola parte do equipo de goberno e algún PDI  deféndese que ao cumprir todos os requisitos non hai motivo para rexeitar a solicitude.

A votación da o resultado de:
Votos a favor da petición da renovación: 27
Votos en contra:                                           12
Abstencións:                                                   2

Punto 14.- Posicionamento da UDC sobre o proxecto de Residencia Universitaria.

Consensúase  cos alumnos o texto que se xunta, farase a maior difusión posible da resolución.

Punto 15.- Renovación das Comisións Delegadas do Consello de Goberno

Entre o PAS consensúase o reparto nas comisións quedando:

COMISIÓN DE EXTENSIÓN UNIVERSITARIA: Mª Carmen Barreiro da Ponte.
COMISIÓN DE PLANS DE ESTUDO: Manuela Pinazas Rego.
COMISIÓN DE ASUNTOS ECONÓMICOS: Nuria Vieira Sousa e Xosé Manuel Portela Fernández.

Punto 16.- Quenda aberta de intervencións

Alumna de IESGA.- Queixase de que no SAPE existe unha precariedade laboral tan importante que repercute directamente no servizo, os alumnos non teñen o apoio que se viña proporcionando desde o servizo. Reclama que se solucione este problema.
Tamén se queixa da situación da ORI, a información non chega aos usuarios ou, ás veces, pérdese.

Luis Barral: Informa sobre o estado da Residencia universitaria de Ferrol.
A día de hoxe o Concello de Ferrol ten aprobado a concesión dunha parcela no Cuartel Sánchez Aguilera. Falta que Defensa asine con Concello a cesión do cuartel. Esta sinatura será antes do día 22 de maio. O Concello procederá, nese momento á cesión. O proxecto xa está aprobado e a realización comezará no momento de que eses tramites conclúan. Pensa que é un optimista pero agarda que todo saia segundo o previsto.

Xosé Portela.- Doulle a razón á alumna de IESGA, a situación de precariedade nos servizos SAPE… é insoportable. Indícolle que o persoal do SAPE contrátase mediante convenios o que fai que sexan contratos absolutamente precarios, e provocan que cando rematan non haxa persoal para que os servizos se poidan proporcionar. Indícolle que esa era a pretensión que o Comité tiña na RPT e que non se substanciou na proposta rexeitada polas asembleas.

Referíndome ao Convenio de PDI congratúlome da súa publicación, de que a universidade pelexase por superar os límites impostos pola Xunta despois do decreto e por superar o marco orzamentario determinado por esta institución. Reclamo o mesmo trato para o PAS laboral e para a RPT máis en concreto.

Indico que a FCDEF quedou, desde o día 6 de abril, sen un traballador na conserxería  o que impedirá, segundo a dirección do propio centro, a normal realización dos servizos o que, á súa vez, repercutirá directamente no bo desenvolvemento da docencia e prácticas do alumnado.

Queremos amosar o noso rexeitamento desta medida que non é máis que un adianto de cómo se perfila a nova RPT de PAS laboral.

Queremos saber, tamén, porqué se incumpriu o artigo 64 do Estatuto dos Traballadores  que obriga á empresa a informar e consultar ao Comité sobre a situación e estrutura do emprego na empresa ou no centro de traballo, así como a ser informado trimestralmente sobre a evolución probable deste, incluíndo a consulta cando se prevean cambios ao respecto.

Fago referencia a que na sesión de hoxe renováronse as Comisións Delegadas pero non se elixiu aos representantes no Consello Social cousa que é, tamén, preceptiva despois da nova composición do Consello de Goberno.

Responden o Reitor e Secretario Xeral que non se fixo, isto último, por esquecemento.

Xerenta: A dotación até o día 6 na FCDEF era de 4 traballadores na conserxería pola mañá e 3 en quenda de tarde. O Decano sabe que era unha dotación extraordinaria. A dotación asignada ao centro é de 6 persoas, incrementouse, puntualmente cunha persoa máis pola inauguración das pistas, coñecéndose que iso era algo que non duraría no tempo. Prolongouse a súa presenza pero nunca se quixo consolidar.

Non entende que a falta dunha persoa na conserxería teña que ter a menor incidencia na docencia do centro.

No SAPE todo o persoal está contratado con cargo a proxectos. A aprobación dos convenios dilátase no tempo o que provoca a disfunción.

Na ORI a dotación está completa, só falta por ocuparse unha praza de aux. administrativo que, en próximos días, o estará por unha persoa con interinaxe.

Xosé Portela.- Insisto en que a dotación dos últimos anos, polo menos, era, na conserxería, de sete persoas, xustifico esta situación na gran dispersión dos centros que, en conxunto ocupan unha grande superficie o que dificulta, cando non imposibilita o desprazamento.

Neste punto intervén o Reitor para indicar que isto é unha batalla entre xerencia e comité polo tanto non é asunto de tratar na sesión do Consello de Goberno. Dá por rematada a sesión.

 

CUT da UDC . SEMPRE DO LADO DAS TRABALLADORAS E TRABALLADORES

Quen somos | Contacto | Axuda

cutudc.com, 2009. Publicado baixo licencia Creative Commons DHTML Menu By Milonic JavaScript