O director da Función Pública di que o Goberno limítase a facer “o mesmo que facía o bipartito” para nomear os seus directivos

Unha reforma de ida e volta con 810 postos máis elixibles a dedo. No ano 2007, o Goberno bipartito modificaba a Lei da Función Pública, a que rexe os traballadores da Administración autonómica. Entre os cambios introducidos, limitábanse os postos directivos para os que os funcionarios podían ser elixidos polo sistema de “libre designación”, isto é, o que popularmente se coñece como a dedo. Segundo esa mudanza legal, só se poderían cubrir con este sistema “os postos de traballo de subdirector xeral, as secretarías de altos cargos así como outros de carácter directivo ou especial responsabilidade para os cales, excepcionalmente, así se determine”.

Tres anos máis tarde, a Lei de Acompañamento dos Orzamentos de 2011 revogou esa medida que, segundo sinalan os sindicatos con representación na Xunta, “nunca se chegou a aplicar”. Coa nova reforma, pasaron a ser elixibles, de novo coa lei na man, os postos de xefes de servizo, algo que a frustrada reforma pretendía evitar.

Con esta reforma baixo o brazo, o director xeral da Función Pública, José María Barreiro, acudiu onte ao Parlamento para respostar a unha pregunta do nacionalista Alfredo Suárez Canal sobre o número de xefes de servizo, agora de novo de libre designación, que “hai na actualidade na Administración galega”. Segundo os datos ofrecidos por Barreiro, “os xefes de servizo de nivel 28” que “son os que van polo sistema de libre designación”, distribúense entre as diferentes consellerías ata dar unha cantidade total de 151 postos da categoría “A1” e 659 da “A1-A2”, di. Así as cousas, os datos aportados polo alto cargo da Consellería de Facenda veñen concluír que, coa reforma legal promovida polo actual Goberno, véñense de sumar 810 cargos aos que son elixibles a dedo polo Executivo galego.

Ante as explicacións do director xeral, Suárez Canal preguntouse “cal é a razón” de esta “volta atrás” no ordenamento da libre designación. Para o parlamentario do BNG, a razón de que os xefes de servizo volvan entrar neste tipo de postos só responde á intención do PP de establecer “un férreo control” de todos os postos directivos da Administración, os cales, asegura, xa non será ocupados “polos mellores”, senón “polos máis submisos” aos populares.

Mentres, dende o Goberno, Barreiro admitiu que a reforma do bipartito ía encamiñada a reducir este tipo de postos se ben, reprocha, “as reformas, ademais de publicalas, hai que aplicalas”. Neste sentido, o titular de Función Pública asegura que esa modificación só foi “de cara á galería” porque non se chegou a aplicar.

Canta teórica diferenza, canta igualdade na realidade