21/03/2011
CUTUDC / Novidades
ACTUALIDADE
'Stress tests' ás nucleares, que tranquilidade
"Que alí as centrais teñan problemas non quere dicir que aquí vaian telos; aquí non temos terremotos nin tsunamis. " -Marià Vila d'Abadal, xerente da Asoc. de Municipios Nucleares
-
Noticias relacionadas
Ao tempo que o accidente de Fukushima subía na Escala Internacional de Accidentes, tamén o discurso pronuclear foi aumentando niveis na paralela Escala de Argumentos Tranquilizadores.
No nivel 1 presumiron de que o terremoto probaba a resistencia das centrais. No 2, recoñeceron o accidente pero aseguraron que era poquilla cousa. Ao subir o 3, recordáronnos que eran unhas circunstancias excepcionais que non debiamos ter en conta. Xa en zona quente, no nivel 4, pediron un debate en frío, e deixándoo aos técnicos. E agora, coa central descontrolada, soben de golpe ata o 6 e prometen revisar a seguridade das centrais.
Anuncian que as someterán a 'stress tests', un termo que xa nos resulta familiar, e máis ben desafortunado: serán as probas de esforzo ás nucleares tan rigorosas como os 'stress tests' á banca? Recorden que os bancos irlandeses superaron a proba, e poucas semanas despois se afundiron.
Si, xa sei que non ten nada que ver unha cousa coa outra. Pero da mesma forma que os tests á banca buscaban sobre todo tranquilizar, non sei se fiarme dunha revisión de seguridade nuclear que parte do apriorismo de que a enerxía nuclear é supersegura e que ademais non podemos renunciar a ela. Onte, por exemplo, xa había "expertos" vaticinando que as centrais españolas superarían calquera proba coa gorra.
Volvemos ao mesmo: as centrais xaponesas estaban preparadas para terremotos, e non obstante non contaban cos danos dun tsunami nunha central xunto ao mar. En España non nos preocupan moito os maremotos, pero inundacións de chuvia e crecidas de río temos unhas cantas cada ano. E unha perda de fluído eléctrico como a de Fukushima pode acontecer por outros motivos, non necesita un tsunami. E se non, sempre nos queda o fallo humano, que xa nos deu algún susto.
Enténdese que queiran arrefriar o debate nuclear. Non sexa que debatamos máis da conta, e acabemos decidindo que non estamos dispostos a correr tanto risco imprevisible.
Isaac Rosa.
CUT da UDC . SEMPRE DO LADO DAS TRABALLADORAS E TRABALLADORES
Quen somos | Contacto | Axuda
cutudc.com, 2009. Publicado baixo licencia Creative Commons DHTML Menu By Milonic JavaScript