Nas ocasións en que oín falar da eliminación de titulacións con pouca matrícula, sempre detectei tres problemas. Un: que o debate é ideal para que afloren odios ancestrais a determinadas disciplinas, causados por traumas infantís ou vinganzas académicas. Dous: que nunca se di que tamén na educación hai modas frívolas, como a xa tradicional aversión ás humanidades, a máis recente contra as ciencias puras, ou o gusto polas técnicas, como se as primeiras non foran necesarias ou se nas segundas non houbera paro. Tres: que se destila unha actitude neocón pola cal á educación hai que aplicarlle leis de rendibilidade e soster só aquilo que ten demanda, algo ao que, por se fora pouco, axuda bastante o Plan Boloña, copiado do esquema americano, pero sen esquema americano.

A consellería, claro, nesta aloucada austeridade que non distingue entre lóxica e precipitación, lánzase ao debate a ver se aforra uns euros. O que moito estraña é que nesa vocación de aforro a ninguén se lle ocorreu falar de que Galicia ten tres universidades (¡tres!) para pouca xente, pouco traballo, poucos recursos e moito profe. E insinúan que unha enxeñería superespecífica debería ter máis de 20 alumnos? Deben de pensar que somos todos parvos.