Sen posibilidade de erro
A situación está moi complicada, a situación económica a nivel xeral coñecémola, a escusa está servida. O caso é que aínda nesta situación non podemos facer máis concesións, se non é agora pode que non sexa nunca.
Ou conseguimos que se cumpra o comprometido ou xa nos podemos esquecer. Xa lles demos tempo suficiente para arranxar unha situación que, se non é agora, enquistarase definitivamente. Non podemos agardar máis.

Todos afectados
Aínda que hai compañeiros e compañeiras directamente afectados polos incumprimentos do equipo que nos goberna, todos estamos afectados. Por un lado xogámonos a consideración do colectivo e por outro a RPT. Temos que obrigarlle ao reitor a cumprir o comprometido no programa. Imos permitir que o noso colectivo sexa o pozo onde se enterren os contratos irregulares, as externalizacións e os contratos máis precarios e sen dereitos?. Como imos promocionar se non postos aos que poder optar?.

Esperan que fracasemos
Todos os ollos nos observan, uns agardando que teñamos éxito na mobilización, outros, como voitres preeiros agardando o fracaso para facerse cos despoxos. Temos que demostrar que non retrocederemos, que queremos dirixir a política dos que gobernan a universidade ao ben do colectivo. Non podemos caer no desalento nin no desánimo nin sequera na compracencia coa situación, está nas nosas mans facerlles dar un xiro no seu xeito de actuar e que se nos teña en conta.