Segundo explican desde a asociación galega Verdegaia, a Organización Mundial da Saúde establece uns valores límite de emisión de contaminantes máis baixos que os que actualmente son legais na normativa europea. “O pasado ano, dende a UE íanse legalizar os valores máis reducidos cos que xoga a OMS, non obstante finalmente recuaron e deixáronos máis altos xa que senón moitísimas empresas e cidades sobrepasarían os volumes de emisión”, explican dende Verdegaia.

Segundo o estudo de ambas organizacións –referente aos últimos datos oficiais, os de 2009–, “a poboación galega vese afectada fundamentalmente pola contaminación por partículas de suspensión (PM10 e PM 2,5), o principal contaminante en Galicia”.

O informe asegura que “as áreas de aire contaminado segundo os valores recomendados pola OMS son A Coruña, Arteixo, Ferrol, Santiago, Vigo, Valdeorras e a denominada franxa Fisterra-Santiago”.

“Aínda que durante 2009 non se rexistrou ningunha superación dos valores límite legais en vigor para os contaminantes atmosféricos considerados neste informe, si se superaron os valores límite máis esixentes recomendados pola OMS, polo menos para un contaminante, en cinco cidades (A Coruña, Ferrol, Santiago, Vigo e Lugo) e nas redes de vixilancia da calidade do aire dependentes das centrais térmicas de Meirama e As Pontes, da refinería de Repsol e de Ferroatlántica”, indica o estudo.

Por outro lado, no eido da información relativa á calidade do aire nas contornas das grandes empresas o informe de Verdegaia e Ecoloxistas en Acción asegura que “para 2007, 2008 e 2009 non se ten divulgado nin un só dato de ningunha das estacións situadas na contorna da central térmica de Sabón, de Cementos Cosmos en Sarria, de Ferroatlántica Sabón e Ferroatlántica Dumbría, de Materiales del Atlántico e de Sogama”.

Do mesmo xeito apuntan: “Para 2008 e 2009 non se divulgou ningún dato das estacións asociadas á fábrica de Ence”.

“A calidade do aire en Galicia en xeral é mala, a pesar do que di a Xunta, aínda que por suposto que non chega aos volumes de polución e contaminación que estes días viamos en grandes urbes como Madrid e Barcelona”, explicou o membro de Verdegaia Xosé Veiras.

Segundo explican os ecoloxistas, a lexislación establece que as partículas en suspensión non poden exceder os 40 microgramos por metro cúbico. “Non obstante, a Organización Mundial para a Saúde recomenda un límite máis estrito de 20 microgramos por metro cadrado. “Este valor ía entrar en vigor o pasado 2010 pero finalmente Europa recuou”, afirma Xosé Veiras, de Verdegaia. Deste xeito, se as recomendacións da Organización Mundial para a Saúde fosen lei, segundo os datos destes grupos ecoloxistas –que din son sacados do rexistro da Xunta –sete estacións urbanas de medición da calidade do aire terían superado os valores indicados de partículas en suspensión.

Este informe non é o primeiro que sae á luz nestas xornadas que vai en contra dos postulados da Xunta, que asegura que a calidade do aire galego é boa. De feito, co gallo da polémica suscitada pola aparición de altísimos niveis de partículas en suspensión en Madrid e Barcelona, a asociación ecoloxista Adega recordou un estudo realizado no que aseguraba que as sete grandes cidades galegas sobrepasaron en varias ocasións o pasado ano os límites legais de emisións de óxidos de nitróxeno, gases nocivos para a saúde.

o Xornal