febreiro de 2011
 
 

14/02/2011

   CUTUDC / Novidades

  ACTUALIDADE

Declaración da Asemblea dos Movementos Sociais

Nosoutras e nosoutros, reunidos na Asemblea de Movementos Sociais, realizada en Dakar durante o Foro Social Mundial 2011, afirmamos a achega fundamental de África e dos seus pobos na construción da civilización humana. Xuntos, os pobos de todos os continentes, libramos loitas onde nos opoñemos con grande enerxía á dominación do capital, que se oculta detrás da promesa de progreso económico do capitalismo e da aparente estabilidade política. A descolonización dos pobos oprimidos é un gran reto para os movementos sociais do mundo enteiro.

 

 

Afirmamos o noso apoio e solidariedade activa aos pobos de Túnez e Exipto e do mundo árabe que se levantan hoxe para reivindicar unha real democracia e construír poder popular. Coas súas loitas, mostran o camiño a outro mundo, libre da opresión e da explotación.

Reafirmamos con forza o noso apoio aos pobos de Costa de Marfil, de África e de todo o mundo na súa loita por unha democracia soberana e participativa. Defendemos o dereito á autodeterminación e o dereito colectivo de todos os pobos do mundo.

No proceso do FSM, a Asemblea de Movementos Sociais é o espazo onde nos reunimos dende a nosa diversidade para xuntos construír axendas e loitas comúns contra o capitalismo, o patriarcado, o racismo e todo tipo de discriminación.

En Dakar celebramos os 10 anos do primeiro FSM, realizado en 2001 en Porto Alegre, Brasil. Neste período construímos unha historia e un traballo común que permitiu algúns avances, particularmente en América Latina onde logramos frear alianzas neoliberais e concretar alternativas para un desenvolvemento socialmente xusto e respectuoso da Nai Terra.

Nestes 10 anos vimos tamén a eclosión dunha crise sistémica, expresada na crise alimentaria, ambiental, financeira e económica, que resultou no aumento das migracións e desprazamentos forzados, da explotación, do endebedamento, e das desigualdades sociais.

Denunciamos o rol dos axentes do sistema (bancos, transnacionais, conglomerados mediáticos, institucións internacionais etc.), que, en busca do máximo lucro, manteñen con diversos rostros a súa política intervencionista a través de guerras, ocupacións militares, supostas misións de axuda humanitaria, creación de bases militares, saqueos dos recursos naturais, a explotación dos pobos, e manipulación ideolóxica. Denunciamos tamén a cooptación que estes axentes exercen a través de financiamentos de sectores sociais do seu interese e as súas prácticas asistencialistas que xeran dependencia.

O capitalismo destrúe a vida cotiá da xente. Pero a cada día nacen múltiples loitas pola xustiza social, para eliminar os efectos que deixou o colonialismo e para que todos e todas teñamos unha digna calidade de vida. Afirmamos que os pobos non debemos seguir pagando por esta crise sistémica e que non hai saída á crise dentro do sistema capitalista!

Reafirmando a necesidade de construír unha estratexia común de loita contra o capitalismo, a nós, movementos sociais:

Loitamos contra as trasnacionales porque sosteñen o sistema capitalista, privatizan a vida, os servizos públicos, e os bens comúns, como a auga, o aire, a terra, as sementes, e os recursos minerais. As transnacionais promoven as guerras a través da contratación de empresas militares privadas e mercenarios, e da produción de armamentos, reproducen prácticas extractivistas insostibles para a vida, acaparan as nosas terras e desenvolven alimentos transxénicos que nos quitan aos pobos o dereito á alimentación e eliminan a biodiversidade.

Esiximos a soberanía dos pobos na definición do noso modo de vida. Esiximos políticas que protexan as producións locais que dignifiquen as prácticas no campo e conserven os valores ancestrais da vida. Denunciamos os tratados neoliberais de libre comercio e esiximos a libre circulación de seres humanos.

Seguimos mobilizándonos pola cancelación incondicional da débeda pública de todos os países do Sur. Denunciamos igualmente, nos países do Norte, a utilización da débeda pública para impoñer aos pobos políticas inxustas e antisociais.

Mobilicémonos masivamente durante as reunións do G8 e G20 para dicir non ás políticas que nos tratan como mercadorías!

Loitamos pola xustiza climática e a soberanía alimentaria. O quentamento global é resultado do sistema capitalista de produción, distribución e consumo. As transnacionais, as institucións financeiras internacionais e gobernos ao seu servizo non queren reducir as súas emisións de gases de efecto invernadoiro. Denunciamos o "capitalismo verde" e rexeitamos as falsas solucións á crise climática como os agrocombustibles, os transxénicos e os mecanismos de mercado de carbono, como REDD, que ilusionan a poboacións empobrecidas co progreso, mentres privatizan e mercantilizan os bosques e territorios onde viviron miles de anos.

Defendemos a soberanía alimentaria e o acordo alcanzado no Cumio dos Pobos Contra o Cambio Climático e polos Dereitos da Nai Terra, realizada en Cochabamba, onde verdadeiras alternativas á crise climática foron construídas con movementos e organizacións sociais e populares de todo o mundo.

Mobilicémonos todas e todos especialmente o continente africano, durante a COP-17 en Durban, Sudáfrica, e a Río +20, en 2012, para reafirmar os dereitos dos pobos e da Nai Terra e frear o ilexítimo acordo de Cancún.

Defendemos a agricultura campesiña que é unha solución real á crise alimentaria e climática e significa tamén acceso á terra para a xente que a vive e a traballa. Por iso chamamos a unha gran mobilización para frear o acaparamento de terras e apoiar as loitas campesiñas locais.

Loitamos contra a violencia cara á muller que é exercida con regularidade nos territorios ocupados militarmente, pero tamén contra a violencia que sofren as mulleres cando son criminalizar por participar activamente nas loitas sociais. Loitamos contra a violencia doméstica e sexual que é exercida sobre elas cando son consideradas como obxectos ou mercadorías, cando a soberanía sobre os seus corpos e a súa espiritualidade non é recoñecida. Loitamos contra o tráfico de mulleres, nenas e nenos.

Defendemos a diversidade sexual, o dereito a autodeterminación de xénero, e loitamos contra a homofobia e a violencia sexista.

Mobilicémonos todos e todas, unidos, en todas as partes do mundo contra a violencia cara á muller.

Loitamos pola paz e contra a guerra, o colonialismo, as ocupacións e a militarización dos nosos territorios. As potencias imperialistas utilizan as bases militares para fomentar conflitos, controlar e saquear os recursos naturais, e promover iniciativas antidemocráticas como fixeron co golpe de Estado en Honduras e coa ocupación militar en Haiti. Promoven guerras e conflitos como fan en Afganistán, Iraq, a República Democrática do Congo e en varios outros paises.

Intensifiquemos a loita contra a represión dos pobos e a criminalización da protesta e fortalezamos ferramentas de solidariedade entre os pobos como o movemento global de boicot, desinvestimentos e sancións cara a Israel. A nosa loita diríxese tamén contra a OTAN e pola eliminación de todas as armas nucleares.

Cada unha destas loitas implica unha batalla de ideas, na que non poderemos avanzar sen democratizar a comunicación. Afirmamos que é posible construír unha integración doutro tipo, a partir do pobo e para os pobos e coa participación fundamental dos mozos, as mulleres, campesiños e pobos orixinarios.

A asemblea de movementos sociais convoca a forzas e actores populares de todos os países a desenvolver dúas accións de mobilización, coordinadas a nivel mundial, para contribuír á emancipación e autodeterminación dos nosos pobos e para reforzar a loita contra o capitalismo.

Inspirados nas loitas do pobo de Túnez e Exipto, chamamos a que o 20 de marzo sexa un día mundial de solidariedade co levantamento do pobo árabe e africano que nas súas conquistas contribúen ás loitas de todos os pobos: a resistencia do pobo palestino e saharaoui, as mobilizacións europeas, asiáticas e africanas contra a débeda e o axuste estrutural e todos os procesos de cambio que se constrúen en América Latina.

Convocamos igualmente a un día de acción global contra o capitalismo o 12 de outubro onde, de todas as maneiras posibles, rexeitaremos ese sistema que destrúe todo ao seu paso.

Movementos sociais de todo o mundo, ¡ avancemos cara á unidade a nivel mundial para derrotar o sistema capitalista!!

 Nosoutras e nosoutros venceremos!!!

FSM Dakar (Senegal) -10 de febreiro de 2011

CUT da UDC . SEMPRE DO LADO DAS TRABALLADORAS E TRABALLADORES

Quen somos | Contacto | Axuda

cutudc.com, 2009. Publicado baixo licencia Creative Commons DHTML Menu By Milonic JavaScript