Está a Universidade en campaña electoral?
Pode ser casualidade pero a min escámame que, xusto en campaña electoral, se asine o Convenio Colectivo de PDI, saian en tromba as convocatorias de PAS funcionario e as promocións, aínda que en fase de borrador, estean en boca de todo o mundo.
Critícase en política, con razón, que se aproveiten as campañas electorais para facer inauguracións, se repartan subvencións…, parece que o peor da política tamén se exporta as campañas de eleccións sindicais. Se, para moitos cidadáns, todo ou case todo o relacionado coa política fede, e moita xente considera aos políticos como un problema, por este camiño conseguirán que se traslade esa mesma sensación á esfera sindical.

Quítannos do salario para que algúns vaian de vacacións?
Recibín, como todos os traballadores da Universidade supoño, a convocatoria de de axudas de custo para a mobilidade  do persoal docente e do persoal de administración e servizos da Universidade da Coruña no marco do Programa de Aprendizaxe Permanente Erasmus (STT). A súa finalidade é loable, “completar a formación de PAS e PDI” establécese, para elo, que as axudas concederanse por unha estadía dun máximo dunha semana. Pregúntome:
Qué formación se pode adquirir con estadías máximas dunha semana?.
Logo de sacarnos o 5% do salario. É normal que, sendo a formación dunha semana ínfima, se permita tamaño despilfarro?.

A reforma das pensións
Pregúntome como imos contar aos nosos netos como influímos no seu futuro sen que se nos caia a cara de vergoña. E como nos xulgarán ao saber que todo o mundo o aceptou sen chiar porque afectaba máis ás xeracións futuras (chámanse fillos e fillas, netos e netas, non?). Non poderán crer que os representantes dos traballadores tiveron algo que ver niso e que enriba saíron rindo na foto. E tampouco crerán que, grazas á Lei D'Hont -que fai que partidos con mínimos votos consigan máximos resultados-, se propiciase que uns deputados de cuxo nome xa ninguén se acordará servisen para facer que un dereito fose pisado por un Goberno que prometeu non fallar ao pobo que o elixiu. De todos os xeitos, eles terán a oportunidade na seguinte loita: a xubilación aos 70 anos. Por aí non pasarán ou serán como nós?