xaneiro de 2011
 
 

31/01/2011

   CUTUDC / Novidades

  ACTUALIDADE

Estivemos na Folga Xeral

Coma sempre estivemos na primeira liña de participación, tanto nos piquetes informativos como nas manifestacións convocadas.

Comezamos a actividade ás 10 da noite, en Zara Loxística, Polígono de Sabón, Arteixo, na quenda de traballo das 11 da noite non entrou practicamente ninguén a traballar.

 

 

Ás 5 da mañá concentrámonos na rotonda do Polígono de Sabón, Un nutrido número de garda civil impediu o exercicio de información orixinándose, a pesares disto, unha gran caravana de vehículos.

Fomos, de novo a Zara Loxística para realizar as tarefas de información na quenda das 7 da mañá.

Desde aquí trasladámonos, ás 7.30 horas, á empresa de reciclaxe de lixo Albada onde o paro foi total.

Recibimos noticias de que tanto no porto da Coruña como no porto exterior e a estación de autobuses o paro era total.

Avísannos de que no Polígono de Pocomaco a numerosísima presenza policial impide ao piquete a labor de información.

Posteriormente fomos ás obras do centro comercial Marineda onde, de novo, a rotundidade da actuación dos piquetes empresariais (a policía), impediu o exercicio normal do piquete informativo.

Ás 9 da mañá concentrámonos, un nutrido piquete, no centro comercial Catro Camiños e Corte Inglés, desde aquí o piquete percorreu as rúas comerciais da cidade parando o comercio.

Aproximadamente a esta hora os compañeiros/as de Ferrol avisan de que os antidisturbios cargan contra o piquete do Polígono de Narón, ás portas do concesionario Bouza Car.

Ás 12.30 horas unha manifestación unitaria de máis de cincocentas persoas percorreu as rúas da cidade desde a Praza de Portugal até a Delegación do Goberno. Na manifestación participou un nutrido número de traballadores/as da Universidade ás que agradecemos a súa presenza.

Durante todo o percorrido da manifestación foron coreadas consignas contra a reforma das pensións, a reforma laboral, os despedimentos e expedientes de regulación de emprego, contra os gobernos e a patronal, e a favor da necesidade de continuar as mobilizacións logo desta folga xeral.

Ao termino da manifestación, un portavoz das organizacións convocantes deu lectura a un comunicado destacando a resposta necesaria da clase traballadora ás agresións tanto do capital como dos gobernos contra os nosos dereitos e condicións laborais.

NA UNIVERSIDADE. Quen abre os centros?

Aínda que descoñecemos as cifras oficiais de participación na Universidade, temos claro que, institucionalmente, non se actúa con racionalidade nin de acordo coa mínima coherencia nos momentos nos que se realiza este tipo de mobilización.

Noutras universidades, cando o persoal de conserxería participa na súa totalidade na convocatoria de folga, o centro non abre as súas portas. Nesta continúase co modelo de equipos de goberno anteriores, os centros son verdadeiros reinos de taifas onde o decano ou director é o rei e señor.

Tamén participa, a nosa institución, do criterio que o "xefe"  ten o dereito e pode exercer o traballo de calquera dos seus subordinados, así os decanos ou directores teñen a potestade de abrir eles mesmos os centros sen ninguén que atenda nas conserxerías.  A Universidade que da instrucións estritas, pola seguridade de persoas e instalacións, sobre a posesión de chaves e aperturas non lle importa que, en días coma este esa seguridade non exista.

Seguindo este mesmo criterio que non vos estrañe que atendan as administracións ou as bibliotecas.

Son os todo terreo da universidade, esquiroles en momentos de folga, teñen ben gañado o seu salario. Todo sexa para que a folga se note o menos posible.

Algo parecido acontece, tamén, en centros e servizos onde as conserxerías son atendidas por traballadores/as contratadas a través de ETT. Traballadores/as precarizados ao máximo, teñen complicadísimo sumarse a accións deste tipo, á Universidade non lle importa, en momentos coma este, transformar algunha biblioteca de préstamo en sala de lectura, cos fondos ao alcance de calquera.

Galería fotográfica

CUT da UDC . SEMPRE DO LADO DAS TRABALLADORAS E TRABALLADORES

Quen somos | Contacto | Axuda

cutudc.com, 2009. Publicado baixo licencia Creative Commons DHTML Menu By Milonic JavaScript