Nunha nota, o Foro da Industria Nuclear indica ademais que a produción do parque nuclear representou durante o pasado exercicio máis do 41% da electricidade libre de emisións xerada no sistema eléctrico español.

Para o organismo presidido por María Teresa Domínguez, estes resultados mostran que, un ano máis, a produción eléctrica das centrais nucleares foi fundamental para o bo funcionamento do sistema eléctrico español.

De feito, a nuclear foi a fonte que máis horas funcionou. Ao longo do ano, as centrais nucleares españolas operaron 7.946 horas, o que, por termo medio, supón máis do 90% das horas do ano e unha porcentaxe moi superior ao doutras centrais de produción eléctrica.

A potencia instalada do parque nuclear español sitúase na actualidade en 7.796 megavatios (MW), o que supón o 7,56% do total do parque de xeración. Esta capacidade incrementouse nun 0,88% durante 2010 grazas ao aumento en 68 MW de potencia da unidade I da central nuclear de Almaraz.

Para Domínguez, resulta "indispensable manter en operación unha enerxía de base como a nuclear porque ofrece estabilidade ao sistema eléctrico de forma eficiente, económica e sen danar a atmosfera".

"Outros países do noso ámbito están a implementar estratexias enerxéticas contando coa enerxía nuclear" e "España ten que seguir esta liña mantendo en operación os seus oito reactores nucleares e establecendo unha planificación enerxética a longo prazo onde a nuclear alcance un peso maior", engadiu.