Sobre a democracia: domesticados e ben alimentados
Na Transición pasouse dunha ditadura fascista a unha democracia sen que nada cambiase para non incomodar os piares que sustentaron durante 40 anos á ditadura, a saber: poder económico, poder militar e poder relixioso. Vivimos unha falsa democracia, onde o Partido Comunista acudiu á Zarzuela a presentar os seus respectos ao monarca designado por Franco como sucesor. Unha democracia que logrou domesticar o movemento obreiro convertendo a maioría de sindicatos en organizacións subvencionadas. Unha democracia subxugada ao Vaticano, que permite á Igrexa católica conservar uns privilexios que obtiveron de xeito moi pouco cristián e que converteron un golpe de Estado e un xenocidio nunha santa cruzada. Unha democracia na que as normas as dita o poder económico, que manterá o seu status e os seus beneficios por enriba de calquera ben común.
O paso da ditadura á democracia foi só nominal: cambiouse a pintura mantendo a estrutura interior.

Vieiros, A Nosa Terra… e agora CNN+. O dereito a ter outros medios de comunicación
Que e quen nos oprimen a capacidade de pensar, sentir, gozar e entristecernos? Iso suxeriume a noticia do peche da cadea de televisión CNN+. Máis alá do enaltecemento de calquera profesional do periodismo, creo que é grave o empobrecemento, non exclusivamente económico, senón tamén humano, que só parece tolerar falsos debates televisivos que encirran broncas e pretenden distraer estimulando os máis baixos instintos

A axuda que non debeu desaparecer
O Goberno eliminou a prestación de 426 euros para os parados de longa duración co obxectivo de aplacar os mercados e reducir o déficit. Isto supón unha pésima noticia, xa que este cheque cumpría un gran labor social a pesar de que a dereita máis reaccionaria o acusase de desincentivar a busca de emprego. A isto habería que responderlles que esta prestación tiña unha duración de apenas seis meses, sempre e cando se recibise unha formación e os ingresos da familia fosen inferiores ao 75% do salario mínimo. Por iso sería preciso que se volvese aplicar, non só porque facía que 688.000 persoas recibisen algún ingreso, senón porque o que custa mantelo son apenas 1.392 millóns. Só con restablecer o imposto de patrimonio, que gravaba a tenza de bens e inmobles superiores a un millón de euros, obteríanse 2.120 millóns, que darían para manter a prestación e pagar parte da débeda