Encarecemento na cesta da compra
Segundo os datos do último trimestre do ano -e tal como sucede sempre nas datas do Nadal-, os produtos básicos encarecéronse unha media do 2,2%, sendo as froitas, verduras, peixes e carnes as que rexistraron maiores subidas. Non existe fórmula máxica, hoxe por hoxe, para comprar unha pescada gorda que pese menos, nin supermercado ao que dirixirnos achando os mellores prezos. Así que non hai outra solución que agudizar o enxeño e buscar as ofertas do día ou comprar marcas brancas e produtos de tempada para que os nosos pelados petos nolo poidan agradecer, aínda a custa de ir de acá para alá empregando moito máis tempo nas compras.
Os comercios téntannos, tal como é a súa obriga, pero as recentes rebaixas de salarios, xunto á conxelación das pensións, fixeron unha importante rotura na cesta da compra familiar

A proposta da OCDE de ampliar a idade de xubilación
A OCDE pide atrasar a idade de xubilación no estado español máis alá dos 67 anos. Curiosa a oportuna presión dos organismos internacionais para avalar a política do Goberno. Pena que cando as cousas van ben non aconsellen medidas que favorezan os traballadores.

A impotencia dos cidadáns e as comisións bancarias
Unha ten a sensación de estar atrapada nunha gran sucursal bancaria onde, ingreses o diñeiro que ingreses, non fan máis que cobrarte comisións. Comisións para pagar as xubilacións anticipadas de traballadores de caixas e bancos; para pagar a débeda que provocaron as financeiras; para pagar os erros doutros labores máis alá das nosas fronteiras; para pagar contratos blindados. Mentres, os curritos que aínda contamos cun soldo traballamos o mesmo ou máis por un salario menor e encontrámonos impotentes ante o que son capaces de facer uns privilexiados do aire. Impotentes tamén ao ver como os impostos se reparten entre catro entidades bancarias insaciables. E, sobre todo, impotentes ao saber que estamos a mercé de da flutuación no parqué e as decisións doutros países.