Na Universidade da Coruña, á espera dos datos exactos, parece que, segundo os xornais, os peores resultados de matrícula seguen concentrándose no campus de Ferrol.

As tres universidades do sistema universitario galego ofertan 141 novos títulos de grao, contando os títulos repetidos en dous ou máis campus.

A adaptación a Boloña implica unha avaliación periódica das carreiras para comprobar se cumpriron os obxectivos fixados. E un deles é ter unha demanda mínima de alumnos. Se non se cumpre, o grao en cuestión podería desaparecer. Isto é polo menos o que se reiterou durante o proceso de adaptación, aínda que unha vez concluído, as pautas que se seguirán nas avaliacións seguen sen estar claras.

A Consellería de Educación sinala que o número mínimo de alumnos, xunto a outros criterios de viabilidade, deben recollerse nunha normativa estatal antes de que a Xunta de Galicia poida dotarse dun marco propio. En calquera caso, unha orientación podería ser o limiar mínimo acordado para a adaptación a Boloña, que a Consellería e as universidades pactaron no ano 2007 en 25 estudantes, tras proporse nun primeiro momento o de 30.

A escaseza de estudantes coincide na maioría dos casos con oferta duplicada ou ata triplicada, aínda que a multiplicación tampouco é sinónimo de aulas a medio aforo en todos os casos. De feito, outras carreiras presentes nas tres universidades gozan dunha demanda elevada, deixando ata a moitos aspirantes fóra. Nesta situación atópanse os graos de mestres ou Enfermería, que se repite nos sete campus galegos.

Dereito ou Administración e Dirección de Empresas (ADE) son outras clásicas que gozan dunha excelente demanda.

Os casos de carreiras con aulas case baleiras persisten, pero, coincidencia ou non, con Boloña son máis os títulos que tomaron distancia coa discreta demanda que mantiñan en anos pasados. As carreiras clásicas son o mellor exemplo. No campus de Santiago, Filosofía pasou de atraer a só 42 alumnos en primeiro a sumar este curso 88. O grao de Xeografía tiña o curso anterior 27 novos matriculados e en 2010 chegou ós 62. En Filoloxía, o incremento no grao de Lingua e Literatura Inglesa é aínda máis espectacular: de 88 matriculados pasou a 197.