As grandes cifras xa se coñecen. Un total de 390 millóns de euros para o 2011, o que falta é fixar os criterios para distribuír o 90% dos recursos que forman parte do financiamento estrutural da Xunta ás universidades. Porque as partidas ligadas única e exclusivamente a obxectivos son mínimas se se comparan cos fondos básicos -para o mantemento das instalacións, persoal e gasto corrente-. Dos 390 millóns, só un 5%, 19,5 millóns de euros, repartiranse en base a obxectivos. Deles, un 30% o serán para obxectivos centrados na investigación, menos de seis millóns para as tres.

Outro 15% (2,92 millóns) recoñecerá o esforzo en materia de transferencia de tecnoloxía; un 25% (4,87), os obxectivos ligados á docencia; un 10% (1,95), á internacionalización; mentres que o resto, case catro millóns, repartiranse en adaptación ás necesidades sociais, a xestión, a responsabilidade social e para potenciar os campus de Ferrol, Lugo, Pontevedra e Ourense.

Falta agora establecer os parámetros para repartir os 351 dos fondos estruturais. Unha das propostas expostas é que dentro deste apartado incluír unha pequena cantidade, entre un 1 e un 3%, na que tamén entren en funcionamento criterios de obxectivos.

No plan anterior ao que está vixente actualmente, o criterio era o financiamento por alumno. Este parámetro está totalmente obsoleto.

O criterio actual é o gasto corrente das institucións, sobre todo no que se refire ao seu capítulo de persoal. Nunha das primeiras comparecencias tras empezar a negociar a Xunta o novo plan de financiamento das universidades, deuse a coñecer que os gastos de investigación tamén estarían incluídos nesta partida básica.

Os tres reitores manifestaron a principios desta semana a súa inquietude pola repartición, xa que todos consideran que non poden recibir menos porcentaxe do total que este ano, pero a torta segue sendo a mesma a distribuír entre as tres institucións.