A folga xeral, unha chamada de atención
Calquera observador imparcial do momento histórico que vivimos concluiría admitindo que o responsable da grave fractura social, a agónica crise ambiental e as agresións aos dereitos fundamentais dos cidadáns é un sistema perverso que antepón os intereses financeiros aos seres humanos. Entón, se partimos desta premisa, a folga xeral do 29 de setembro non debe considerarse como un castigo ao Goberno que só sirva para beneficiar electoralmente a outro partido que, á súa vez, nos dará dobre porción do mesmo. Iso podería suceder se a xente decide quitarlle o seu voto aos malos para entregarllo borreguilmente aos malos. É outro o cambio o que debemos esixir: un cambio de modelo.
A folga debería ser o espertar da era da lucidez para o noso pobo. Un abonda xa! enérxico contra esta política de desenvolvemento suicida que se sustenta nun método de selección natural baseado na cobiza.

O soño da dereita é o pesadelo da maioría
Coa enxeñaría social deseñada polo neoliberalismo que se practica dende os inicios do capitalismo, observamos a penúltima estocada contra o Estado do benestar, o sector público e os dereitos sociais.
O sistema sabe moi ben as consecuencias que carrexa a chantaxe que supón inocular o veleno do medo e do individualismo pailaroco, e que se traduce nun mellor sometemento aos seus designios. En case todos os países europeos xa o conseguiron, e falta pouco para que o triunfo conservador sexa absoluto.
Materializado o efecto da chantaxe, a dereita financeira, política e mediática fregarase as mans ao ver aumentar os seus beneficios económicos grazas aos inxenuos.
O seu soño verase cumprido. Un soño para eles, pero un pesadelo para a inmensa maioría.

Violencia contra as mulleres: ata cando?
Mulleres con fillos ao seu cargo ou que non teñen a ninguén máis que a ese home. Mulleres con estudos ou sen estudos, mulleres con independencia económica ou sen emprego. Mulleres con medo, que viven no medo. Mulleres humilladas, que perden a autoestima. Medio centenar de mulleres asasinadas ás mans das súas parellas ou ex parellas. Son moitas, pero tan só unha morte por esta causa xa é demasiado.