Non podemos menosprezar a convivencia entre pobos
A política de deportacións de romaneses e búlgaros de orixe xitana polo presidente francés Nicolás Sarkozy pon en alerta laranxa a Europa se non rectifica. A circunstancia é grave e preocupante, ademais dun feito abstruso e contrario á razón, polo que non se pode consentir para que non se faga común. Os momentos en que vivimos non nos poden facer retroceder ao pasado, e moito menos facer perder os valores humanos máis básicos.
Aprendemos a convivir e nunca é bo xeneralizar, polo que a segregación racial é inxusta, e ilícita.

Sindicatos necesarios, folga imprescindible
Os sindicatos, todos, non pasan polo seu mellor momento en apreciación e credibilidade, os erros cometidos polos sindicatos maioritarios páganos tamén o resto. Os traballadores míranos con receo e a dereita máis recalcitrante, xunto con algúns traballadores desubicados, desprestíxianos e menoscaban sen compaixón nin comprensión.
Pero -que ninguén se confunda- os sindicatos desenvolven un labor esencial nun Estado democrático defendendo os intereses dos traballadores. E se non existisen, habería que inventalos, (de feito os sindicatos minoritarios apareceron porque os sindicatos maioritarios deixaron de ser a ferramenta necesaria para moitos traballadores/as) pois é evidente que os poderes económicos teñen máis desenvolvido o sentido da cobiza que o da equidade.
Por isto, se os sindicatos son necesarios, tamén o son as folgas. A do día 29 de setembro é imprescindible. E éo pola recente reforma laboral -claramente lesiva para os traballadores-, pola inminente reforma das pensións, e porque hai que poñer freo á paulatina deterioración das condicións laborais e salariais.

A suba da factura da luz e a folga xeral
Que pouco dura a alegría na casa do pobre. A principios de verán, congratulámonos todos da conxelación das tarifas eléctricas. Pero durante o verán desconxelouse e agora no outono encontrámonos cunha suba do 4,8%.
Na industria, á parte dos custos salariais, o maior custo é o enerxético. E iso fará que haxa un novo cisma na CEOE tras a suba na factura da luz.
Por un lado, encontraranse as eléctricas, encantadas pola suba, e, polo outro, o resto dos sectores empresariais, consumidores da devandita enerxía. Aínda non está clara a postura oficial do presunto estafador presidente da CEOE, creo que non se posicionou con claridade.
O que está claro é que os mesmos que se puxeron de acordo para paralizar a suba da luz, para que comezásemos con bo pé o verán e consumísemos como tolos polos quioscos, agora se decantaron por unha suba da factura. Isto, en vésperas dunha folga xeral, fará pensar á oposición que o Goberno pagará un alto custo político, mentres que o Goberno pensará: de perdidos, ao río.
O único que temos que ter claro é que ao final os curritos seremos os que pagaremos a factura da luz, máis cara, e como as empresas reverterán os custos nos produtos estes encareceránse e cos nosos ingresos cada vez máis minguados, e seguiremos votando aos políticos culpables de todo iso.