Malos tempos para os traballadores
Ultimamente non corren bos tempos para o mundo laboral. A recente reforma, tras dous meses de tramitación, incorpora -entre outras cousas- un maior control para os desempregados e facilita o despedimento por absentismo laboral.
E é que hai os que pensan que nesta época que nos toca vivir
-paradoxalmente gobernados por mentes de presunta ideoloxía socialista- estas medidas supoñen todo un regalo para o empresario, dado que lle permite poñer de patiñas na rúa calquera traballador antigo a prezo de saldo para suplilo deseguido por outro mozo en condicións precarias.
Por iso, que necesarios son sempre nunha sociedade auténticos líderes que non se engurren ante nada nin ante ninguén -tanto políticos coma dirixentes sindicalistas- poñendo a solución axeitada aos problemas.

A nosa democracia vive tempos difíciles
A democracia necesita disposicións institucionais que comecen pola formación de cidadáns e continúen polas que incitan a unha máxima participación na vida política, colectiva, etc. Pero que vemos na nosa sociedade? Que se demoniza a Educación para a Cidadanía despois de máis de 30 anos de “democracia”. Expándese a xenofobia, criminalízase o diferente pola súa relixión, pola súa etnia xitana, por vir doutra parte. Faise pagar a crise aos humildes asalariados e preténdese rebaixar
o auxilio aos millóns de desempregados.
E por se fose pouco, o PP bloquea os órganos ao servizo de todos, unha forma de corrupción política que se amplía na corrupción económica, negando as evidencias policiais e xudiciais. Promove a opacidade. Non aprecia a unidade na diversidade. Fomenta a desigualdade.
Urxe formar un país de cidadáns e parar a fábrica de resentidos políticos.

O dereito á folga e a necesidade desta
Todas as folgas son lexítimas se teñen motivos abondo, e esta que se convocou para o próximo día 29 de setembro ten unha gran colección deles. A inmensa maioría cabal deste país leva moitos meses utilizando todos os altofalantes de que dispón para criticar aquilo que non debería ter sucedido. Estamos inmersos nunha grave crise da que non somos culpables e que, en cambio, estamos a pagar e seguirán pagando as próximas xeracións se non poñemos remedio a iso. Con esta oportunidade desenmascaráronse máis claramente que nunca os que manexan as marionetas. Todos estamos vendo como os mercados son os que tomaron as rendas do noso futuro e eles son os que decidirán, por nós, como non poñamos remedio, se o futuro será brillante ou, pola contra, novamente gris.