O traballo é moito e quedan moitas cousas por facer:

Mentres que para o PAS Funcionario o camiño parece máis “engraxado”. O PAS Laboral é o que máis dificultade ten á hora de executar o calendario de actuacións acordado no seu momento coa institución.

A Universidade (Xerencia-Reitor) ten que dar resposta ao escrito que lle enviou o Comité con data de 16 de xullo, no que, despois de ter unha reunión con eles se nos pediu que indicarmos as condicións para chegar a un acordo sobre a RPT.

Lembrámosvos que o escrito establecía:

_______________________________________________________________

 

Na reunión mantida o día 14 entre, por unha parte o Reitor e a Xerencia e por outra parte o Comité de Empresa, quedouse  en que este último transmitise por escrito as bases para un posible acordo respecto da RPT. En aras de chegar a ese acordo, e aprazando reclamacións históricas e necesidades do colectivo, consideramos que o mínimo que debe reflectirse na RPT é o seguinte:

• Mantemento das prazas xa consolidadas en anteriores RPT’s:
  • Coordinador de deportes
  • Auxiliar de servizos na Reitoría
  • Auxiliar de servizos na Facultade de Económicas

 

• Compromiso de negociar unha nova RPT no ano 2011 que contemple cando  menos:

 

• Incluír na RPT todos os postos de traballo propios de PAS laboral realizados por empresas alleas a universidade (ETT’s, 3+3, etc).
• Continuar coa prometida profesionalización, situando como responsable de cada unidade e servizo a un pas laboral, e reflectindo estas prazas na RPT (Moitas de estas prazas xa se están pagando mediante complementos).

 

Analizando o documento aprécianse os seguinte erros técnicos:

 

• Falta de clarificación nas denominacións e localizacións dalgunhas das prazas da RPT, sobre todo nas áreas de conserxaría, laboratorios (CITEEC, CIT, SAI, centros...) e do SIC, servizo onde se debe de abordar o cambio de denominación dalgunha das áreas conforme ao negociado.
• A xornada laboral do Técnico Superior de Cultura é ilegal, mentres non se recolla no Convenio Colectivo.
• O novo posto de traballo creado para reforzar as tardes no Campus de Ferrol debe ser o único que soporte esa tarefa cando fora necesario.

 

Na Coruña a 16 de xullo de 2010

 

_______________________________________________________________

 

A Universidade (Xerencia-Reitor) quedou de pasarnos a proposta definitiva sobre a dita RPT para que o órgano de representación procedera ao seu informe.

 

Estamos agardando.

 Convocatorias:

Hai máis dun ano que o Comité de Empresa acordou coa Xerencia as primeiras convoatorias da RPT de 2005, a día de hoxe non se fixo ningunha proba.

Derivado da deixadez da Xerencia, haberá que clarexar a situación das convocatorias de concurso-oposición ás que lles remata o prazo de execución en novembro, nin sequera se  levou á práctica o acordado proceso de formación.

Neste camiño de execución da RPT de 2005 temos que dicir que o Comité xa informou da práctica totalidade das convocatorias que a xerencia lle puxo enriba da mesa, agardamos, polo tanto que se axilicen as convocatorias de todas as categorías profesionais informadas.

O outono pode quentarse