Algún iluso aínda tiña unha mínima esperanza de que, como o goberno di que é de esquerdas, faría que lles tocara aos poderosos un aumento dos seus impostos, o Ministro de Fomento xa os sacou do seu erro, veu a dicir que todos e todas as que vivimos no Estado Español pagamos uns impostos moi baixos. Abriu a porta a "homologalos coa media da Unión Europea (UE) para ter en España "servizos e infraestruturas de primeira".

Parte o sr. Blanco dunha premisa que aceptamos todos, os servizos públicos no Estado Español non son de primeira, nin de segunda e habería que facerlles as probas esas do estrés para saber si son de terceira ou rexional preferente.

A presión fiscal xa aumentou significativamente nos últimos anos sen que se observase unha mellora notable nos servizos públicos, tampouco os salarios e pensións aumentaron na mesma proporción.

De todos os xeitos o que menos lle interesa a este señor é que os servizos públicos sexan de calidade isto maniféstase nunha chea de políticas que van desde a descapitalización destes servizos até a súa privatización acompañados dun deterioro crecente nas condicións de traballo e salario dos traballadores e traballadoras que nela prestan servizo.

O que fixo o ministro foi lanzar un globo sonda para saber como reaccionaría o persoal diante dun incremento impositivo nos próximos orzamentos.

 

Non imos facer nós as contas, xa as fixeron os técnicos do Ministerio de Economía e Facenda:

 Neste sentido, Gestha advirte de que se se consideran os impostos que soporta un español polo consumo (IVE e Impostos Especiais), a presión fiscal sobre o salario medio se elevaría ata o 47,01%, e podería mesmo superar o 50% se se engaden os pagamentos medios dos impostos sobre sucesións ou doazóns, transmisións patrimoniais, actos xurídicos documentados, impostos municipais ou taxas En cambio, a presión sobre os traballadores de Holanda é o 45%, Alemaña o 52%, Finlandia 43,5% e Austria 48,8%.

A PRESIÓN FISCAL NON É HOMOXÉNEA

Os técnicos de Facenda consideran que a presión fiscal non é homoxénea para o conxunto dos cidadáns, e que existe unha presión fiscal "dual"; por un lado, a que soportan as rendas que poden ser ocultadas como son as das empresas e profesionais e, por outro, a que soportan as rendas "retidas en orixe" e, polo tanto, coñecidas e recadada pola Facenda Pública.

Sabe de sobra este señor que sendo verdade que os impostos que soportamos non son os máis altos da UE a relación entre estes e o salario dos cidadáns fai que a presión fiscal sexa das máis altas da UE.

O sr. Ministro quere ter máis cartos para así poder subvencionar aos seus amigos os grandes construtores, aos banqueiros, patrocinar a venda de coches, privatización das caixas de aforro, subvencionar os despidos empresariais…

Até agora para facer estes dispendios sacaron os cartos das carteiras dos traballadores/as e queren seguir facéndoo. Noutros países europeos, non moi progresistas por certo, xa cambiaron os modelos impositivos para facer que as altas fortunas cotizasen máis, aquí, ao señor que fixo estas declaracións nin sequera se lle pasa pola cabeza esta alternativa.

Tampouco lle preocupa a erradicación da fraude fiscal. É escandaloso que mentres que os asalariados e pensionistas declaran unha media de ingresos anuais de 19.800€, os empresarios da PEME declaran 12.500€ e os profesionais liberais 12.089€

Tampouco lle preocupa a evasión de capitais, fai pouco tempo os mesmos traballadores de facenda denunciaron esta circunstancia. Nestes casos os que fan bandeira da súa españolidade, os cartos que lle rouban ao Estado, proceden, case tódalas veces, de asuntos turbios (entre eles dos Gürtel, velódromos, Palaus…) pensan que é mellor que se acochen e produzan no estranxeiro, la pela es la pela, a patria vai despois.

Temos que esixirlles a estes gobernantes de pacotilla que, por un lado combatan a fraude fiscal e por outro lado fagan unha nova política fiscal progresiva e progresista que, de verdade, faga que a maior  aportación ao gasto público sexa dos que máis teñen.

PD.

Permitídenos, por un momento e noutro terreo, facer o mesmo xogo que esta xente. O paro no Estado Español sube con creces do 20% en Europa a media está arredor do 10%, sendo en países como Holanda do 2,8% ou Alemaña do 7%. Queremos que o paro sexa, de xeito inmediato, comparable con esa europea de referencia. Os catro millóns e medio de parados/as postos aproducir e cotizar, seguro que o fan de boa gana, son unha forza impresionante.