As declaracións de Federico Gutierrez Solana, presidente da CRUE, sacan á luz un dos aspectos que xa o PAS coñecía desde fai tempo. Por moito que se ocupen de minusvalorar ao colectivo de traballadores/as, toda a comunidade universitaria ten moito onde rascar.

Que vai pasar cos alumnos/as aos/ás que, por desgraza, lles toque un destes docentes?.

Serán un dos danos colaterais dunha guerra na que se xoga a pervivencia da universidade pública?.

Tamén aproveitou a ocasión para pedir máis orzamento para as universidades. Os reitores, debido á implantación do novo modelo, non deixan de reclamar ás administracións máis investimentos, en concreto o sr. Federico segundo a noticia di: “Hai que investir máis, a pesar dos momentos delicados, porque a educación é a mellor inversión de futuro”, totalmente de acordo.

En máis centros onde instalar ao PDI, incluídos aos que non se van a adaptar, pero para as conserxerías  contratamos a ETTs, os laboratorios xa os xestionarán os alumnos mediante bolsas, os mantementos xa se externalizarán…

Para as vivendas unifamiliares destinadas ao PDI (visitante, en pricipio).

Para os gastos tipo “sala capricho”.

Para percheiros, lámpadas… de deseño como fan nalgún centro.

Etc.

Aquí está a verdadeira cuestión, agora estamos nun momento moi importante no devir da universidade, non só no aspecto estrito, e estreito, da docencia. Comezan a pesar moitísimo aspectos que até hoxe eran inéditos como a calidade e a produtividade. A consecución dun nivel “aceptable”, coa precarización que existe hoxe en día nos servizos da UDC é un obxectivo absolutamente inalcanzable.

1.  Nesta Universidade hai centros, cos correspondentes laboratorios, que non teñen ningún PAS técnico para xestionalos.

2.  Hai servizos nos que hai moitos máis bolseiros, relizando traballos propios dos profesionais,  que traballadores.

3.  O subemprego (ETTs, contratos tipo Labora…) é práctica común nesta nosa UDC.

4.  Hai servizos onde a externalización é practicamente total.

5.  Non imos falar da profesionalización nin da carreira, promoción…,  á que como PAS deberiamos ter dereito.

 En definitiva, todo, ou gran parte do que se inviste, é para a fachada quedando os cimentos de cartón pedra.

 A RPT do PAS, ter unha plantilla que sustente a actividade administrativa e de servizos da universidade, é fundamental para acadar os niveis de eficiencia que se lle requirirán  no novo marco da EEES.