Queremos deixar claro que consideramos Reganosa como unha industria perigosa, ilegal e innecesaria.

 

Tamén queremos deixar claro que o que está a pasar con esta empresa é un reflexo do que o capitalismo máis ruín entende por interés estratéxico.

 

O poder político, tanto nas épocas do PP como nas do bipartito, considerou Reganosa de interés estratéxico, esa consideración foi a escusa para pasar por alto os lexítimos intereses da poboación que se asenta preto desta empresa á que se instalou unha bomba á veira das súas casas, propiciando un confronto que os afectados/as e cidadáns seguen facendo patente cada vez que un gaseiro entra na ría de Ferrol.

 

En coherencia con esta consideración, a de ser estratéxica para Galicia, debería levar consigo que o capital público fose maioritario, cando non o único, para impedir calquera circunstancia que fose contraria a eses “intereses”

 

No canto de ir por ese camiño o poder económico presionou primeiro á Xunta de dereitas para que procedera a súa privatización e despois ao bipartito para que aceptase de bo grado o “statu quo”.

 

Hoxe o que é para ese poder político unha empresa estratéxica pasará as mans dun fondo de capital risco que negociará coa empresa non en función dos intereses dos galegos e galegas senón en función dos seus intereses específicos.

 

Para os cidadáns que viven preto da empresa isto tamén supón un factor engadido de preocupación. Se antes non se contaba con eles á hora de ter en conta a perigrosidade das accións, agora, baixo unha perspectiva exclusivamente mercantilista e especulativa, moito menos.

 

Os traballadores/as da empresa, en casos como este, son a outra parte afectada, pasan de formar parte dunha empresa á que se lle recoñece unha importancia especial para traballar para especuladores aos que o único que lles interesa son os vaivéns do mercado.

 

Isto tamén pon ás claras que as caixas de aforro non son ese principio ou fundamento de banca pública galega, interesada polos proxectos estratéxicos e/ou importantes para o devir de Galicia. Os que así o pensaban non deixan de ser uns ilusos que descoñecen a realidade do País.

 

O capital “galego” non ten ningunha conciencia de galeguidade, interésalle coma ese grupo de capital risco que agora se fai coa maioría de Reganosa o devir económico dos seus investimentos, xa pasou con anterioridade coa empresa de telecomunicacións R (con esta aínda foi máis evidente, concellos onde eles forman parte do goberno desfixéronse das accións ao mesmo tempo que as caixas), pasa, de novo con esta empresa. Haber cando espertan!.

 

A Xunta non descarta desprenderse da súa participación en Reganosa. Esiximos que as empresas “estratéxicas” sexan de capital público para así garantir os intereses xerais de Galicia.  

Dito isto reclamamos o desmantelamento desta empresa que representa un perigo real para a poboación próxima.