Desde primeira hora da mañá veciños e amigos concentráronse nas vivendas destas persoas agardando acontecementos.

Finalmente o desaloxo non se produciu.

Os veciños/as veñen, desde fai tempo mobilizándose para que se cumpran os acordos alcanzados que se centran no realoxo na mesma zona.

Aínda que as accións que están a levar adiante céntranse na Xunta que foi o ente expropiador, non descartan accións contra o Concello e contra a Universidade.

Ao Concello acúsano de incumprir, tamén, os acordos acadados con eles e que teñen que ver co plan da zona.

Á Universidade acúsana de, a pesar de ser o beneficiario da obra, evadir toda a responsabilidade que a legalidade lle atribúe:

A Disposición Adicional Cuarta do Real decreto 1/1992, polo que se aprobou o Texto refundido da Lei sobre réxime do solo e ordenación urbana, establece:

“Cando se actúe por expropiación, a Administración expropiante ou, no seu caso, o beneficiario da expropiación deberán poñer a disposición dos ocupantes legais afectados vivendas nas condicións de venda ou aluguer vixentes para as suxeitas a réxime de protección pública e superficie adecuada ás súas necesidades, dentro dos límites establecidos pola lexislación promotora”.

Acusan, tamén, á UDC de evitar as reunións cos propios veciños e de, dada a responsabilidade anteriormente citada, non querer actuar de mediador diante da Xunta para propiciar a solución da situación.

 

A nós tamén nos parece que a UDC, cando menos, debería amosarse próximo aos veciños e veciñas do entorno en que se implanta, como institución non pode ser allea a eses intereses e debería propiciar o arranxo da situación facendo a presión e intermediación necesaria diante da Xunta.