Pontevedra é, porcentualmente, a provincia galega na que menos emprego estable se creou durante este período, xa que só o 8,19% dos 154.455 contratos son indefinidos. Mentres que en Lugo a cifra ascende ao 13,93% ao terse asinado 5.145 contratos indefinidos dun total de 36.933. No caso de Ourense, este tipo de contratación representa o 10,96% do total (32.545).

No pasado mes de xullo, A Coruña rexistrou un 24,71% máis de traballos respecto ao mes anterior, pero un 4,43% menos que no primeiro mes de verán de 2009. Dos 32.305 traballos que se crearon na provincia coruñesa en xullo, 2.207 foron indefinidos, un 0,32% máis que no mes de xuño e un 9,03% menos que en xullo de 2009. Estas cifras son as máis baixas dos últimos cinco anos.

No conxunto de Galicia, os datos son máis preocupantes, posto que durante o primeiro mes da campaña estival se asinaron -dun total de 77.892- un 6,83% menos de contratos indefinidos que en xuño e un 14,68% menos que en xullo de 2009. En España, a caída experimentada pola contratación indefinida no mes de xullo foi do 13,7% respecto ao ano pasado e do 2,97% en relación ao mes anterior.

Correspóndelle, tamén, ao estado español ser o segundo país da Unión Europea con maior porcentaxe de traballadores con contrato temporal, un 25,4%, superada tan só por Polonia, cun 26,5%, e seguida de Portugal, cun 22%, e Holanda, onde este tipo de contratos supoñen o 18% do total, segundo os datos publicados pola Oficina estatística europea, Eurostat.