Na décimo cuarta semana de folga, persoal médico das Urxencias do Hospital Clínico de Santiago vén de pedir amparo ao xulgado ante os continuos “colapsos” que denuncia no servizo, o último este pasado luns. A delegada de prevención enviou a solicitude na pasada tarde “co fin de evitar situacións catastróficas como as acontecidas nas datas recentes nas que mesmo se produciu o falecemento de pacientes tras deteriorarse nos corredores sen ter podido ser diagnosticados axeitadamente polos médicos”.

Así, Fátima Nercellas --a mesma doutora que trasladou á Fiscalía o caso das dúas mortes que agora se investiga-- requiriu ao xulgado de instrución de garda que “acorde de maneira inmediata requirir ao Sergas para que tomen medidas inmediatas para que os pacientes de Urxencias poidan ser atendidos debidamente e os médicos poidan prestar servizos nas debidas condicións”. “Así, nun corredor, non podemos prestar asistencia axeitadamente”, advirte a delegada de persoal na petición á que tivo acceso Praza.gal, na que reclama "unha medida cautelar urxente" e que “se tomen as medidas para que se cumpra a normativa e, en particular, a de seguridade e hixiene no hospital”. 

"O Sergas é coñecedor da situación que se denuncia e, no entanto, non se adoptan as medidas necesarias", di o escrito presentado nos xulgados. A xerencia do Clínico asegura que non recibiu comunicación nin requirimento ningún xudicial. 

A “masificación” e os continuos “colapsos” no servizo de Urxencias do Clínico veñen sendo denunciados constantemente tanto por persoal como por usuarios e pacientes desde hai meses. O ateigamento do espazo no pasado mes de xaneiro levou a que a Fiscalía abrise unha investigación pola morte de dous enfermos tras longo tempo agardando nos corredores. Segundo Nercellas, o amoreamento de pacientes nos corredores continúa.

 “Este luns ao mediodía chegou a haber 19 pacientes; sobre as catro da tarde eran 13 as persoas clasificadas para entrar nos cubículos pola súa situación e que estaban agardando nos corredores”, explica Nercellas, que enviou --como no día no que trasladou á Fiscalía o caso das mortes-- un correo advertindo á xerencia do Sergas e a dirección da área sanitaria do problema e da necesidade de abrir espazos para a atención. Ante a falta de resposta, decidiu pedir amparo á xustiza porque “non se pode explorar unha persoa enclaustrada no corredor”. “Adoitan dicir que minto e iso non é certo”, explica ante o rexeitamento de Sanidade ás súas denuncias. 

A petición de amparo chega cando a folga semella achegarse ao seu final logo de catorce semanas. A asemblea de traballadores celebrada este luns debateu a última proposta da xerencia e a comisión de centro acordou presentar unha última contraoferta na que se acepta a dotación de profesionais pero reclamando dous médicos máis dos dous que propoñía a dirección. Tamén se solicitará un maior detalle e concreción no que ten que ver coa apertura de diversas zonas en caso de aumento da demanda asistencia, así como da dotación de medios e persoal de enfermería, auxiliares e médicos nelas. 

Será o mércores cando a xerencia e os traballadores debatan esta última proposta para poñer fin á folga convocada pola comisión do centro. Podería ser o final deste paro, aínda que polo momento o que seguirá será o convocado para os médicos polo sindicato O’Mega. 

O cadro de persoal deste colectivo está formado por 40 profesionais e coa folga reivindicaron 47 para facer as quendas, aínda que con posibilidade de rebaixar o número para chegar a un acordo. Ademais, prevén que se contraten máis traballadores fixos xa que hai oito máis non fixos que o Sergas contrata para cubrir ausencias. 

Os médicos aceptarían agora catro profesionais máis pero sempre que lles concreten a presenza real e o número de interinidades para que os postos sexan estables, ademais de non traspasar a “liña vermella”: “Teñen que protexer a saúde laboral”. 

https://praza.gal/acontece/persoal-de-urxencias-do-clinico-de-santiago-pide-amparo-a-xustiza-ante-un-novo-colapso

Noticias relacionadas

Persoal de Urxencias do Clínico de Santiago acepta a nova proposta do Sergas e remata a folga